10 أسئلة تختصر لك طريق الدراسة في ألمانيا
كتب- إيمان شاهين:
الكثير من الطلاب يتطلعون للدراسة بالجامعات الألمانية سواء في مرحلة التعليم الجامعي أو ما بعده.
وفي جامعة المنصورة، أُقيم مؤتمر بمشاركة وفد جامعة Bremen ومنظمة جسور الألمانية، وتحدث المشاركون في كل مايحتاجه الطالب الصري للحصول على منحة دراسية في ألمانيا.
من خلال المؤتمر نشرح لكم كل ما تحتاجونه عن خطوات الدراسة والسفر والاستقرا بألمانيا في 10 أسئلة.
ما تكلفة الدراسة في ألمانيا؟
مصاريف الجامعة في ألمانيا متوسطها من 250 لـ350 يورو في الترم والجامعة بتوفرلك خدمات زي وجبات مخفضة في الكافيتريا بالإضافة إن كل مواصلاتك مجانا عشان كده تعتبر الدراسة في ألمانيا من أرخص الدول اللي ممكن تدرس فيها.
ما الأوراق المطلوبة لحجز التذكرة والسفر؟
♠ بيان درجات الثانوية العامة باللغة العربية يستخرج من الإدارة التعليمية (في حالة التقديم للحصول علي البكالوريوس).
♠ شهادة البكالوريوس للتقديم علي الماجيستير و الدكتوراه.
♠ شهادة اللغة ألماني أو إنجليزي.. (اللغة الألمانية 3 مستويات a b c ، وكل مستوى يتكون من 3 مراحل، ويشترط في حال التقدم للمجال الطبي أو الهندسي أن يكون المستوى c1 وأي مجال آخر b1.
♠ شهادة بيان درجات من الجامعة (لو هتكمل دراسة في نفس المجال اللي درسته في مصر).
♠ توثيق الورق من وزارة الخارجية.
♠ ترجمة الورق بالألماني(علي موقع السفارة هتلاقي عناوين و أرقام المترجمين المعتمدين هناك).
♠ التصديق علي الورق في السفارة الألمانية (لو طبعت ورق الطلبات من على موقع الجامعة هيكون متاح التصديق علي الورق ببلاش).
♠ خطاب التوصية (بتطلب من دكتور في الجامعة يكتبهولك ويمضي عليه).
♠ خطاب تحفيزي.
♠ شهادة الخبرة في العمل (إن وجد).
♠ شهادات التطوع والعمل الخيري مختومة من جهة التطوع فقط.
(تقدر تقدم لأكتر من جامعة في نفس الوقت بحد أقصي 5 جامعات)
♠ سيرتك الذاتية.
وماذا عن الخطاب التحفيزي؟
أغلب الطلبة اللي بيقدموا على المنحة بيقدموا نفس الورق لكن اللي بيفرق بينهم هو الخطاب التحفيزي.
الخطاب التحفيزي هو إنك بتكتب للجامعة الدوافع الداخلية والخارجية للدراسة فيها ودي بتختلف من شخص لآخر زي مثلا إن المجال ده مش موجود دراسته غير في ألمانيا ده سبب مهم ولازم يتكتب.
توضح في الخطاب لو كان فيه أماكن معينة موجود فيها دراسة المجال ده وترتيب الجامعة اللي بتقدملها بين الأماكن دي.
ابعد عن كتابة إن من أسباب تقديمك للدراسة هناك إن ألمانيا رخيصة للطلبة أوالدراسة فيها ببلاش.
الأسباب اللي تتكتب في الخطاب كلها لازم تكون أسباب مقنعة لأنها أكيد هتكون سبب من أسباب القبول في الجامعة.
لازم تعمل اعتبار لمتطلبات المجال اللي هتدرسه وعلاقته بسوق العمل وتوضح ده في الخطاب باختصار.
تعرف نفسك وتوضح سبب اهتمامك مجال الدراسة ده في 3 جمل فقط.
توضح علاقة المجال اللي حابب تدرسه بدراستك في مصر أواللي درسته قبل كده.
توضح التدريبات اللي قمت بيها تبع الدراسة أو العمل التطوعي.
تكتب نظرة مستقبلية لشغلك بعد الدراسة.
سبب اختيارك للجامعة دي والمجال ده بالذات.
في حالة التقديم لدراسة الدراسات العليا بتوضح السبب عشان تكمل دراستك في ألمانيا مش في مصر.
ابعد تماما عن أي خطابات تحفيزية من على النت مهما غيرت في الصيغة مجرد ما بيكتشفوا إنه من النت الورق بيترفض.
وما طريقة التقدم للجامعة التي أرغب في الدراسة بها؟
إرسال مباشر للجامعة التي تريد الدراسة بها.
إرسال لمكتب التنسيق: من موقع الجامعة هتقدر تعرف الجامعة بتتعامل مع مكتب تنسيق أو لا و عنوانه، تكلفة مكتب التنسيق 75 يورو لأول جامعة و 15 يورو لأي جامعة إضافية.
هل تحتاج الجامعة لضمان يُثبت جدّية ما أريد؟
عشان الجامعة تقبلك للدراسة فيها لازم تتأكد إن عندك فلوس تكفيك في السنين اللي هتدرس فيها وده بأكتر من طريقة:
فتح حساب مغلق ب 8640 يورو في بنك Deutch bank أوsutor .. والجامعة بتقفل الحساب ده و بتسمحلك تسحب منه 760 يورو كل شهر لمصاريفك فقط.
ما طريقة فتح الحساب المغلق؟
توقيع حامل الباسبور في الصفحة الرابعة من الباسبور و يتصور.
إثبات مصدر الفلوس: ممكن تشوف حد عنده نفس المبلغ يعمل بيه كشف حساب و تقول إن هو مصدر التمويل.
تبعت الورق ده علي عنوان البنك و هما بيردوا عليك برقم حساب تحول عليه الفلوس.
ضامن ألماني: في حالة إن مش متوفر مبلغ 8640 يورو بتدور علي شخص ألماني أو معاه إقامة مفتوحة في ألمانيا مرتبه صافي بعد الضرائب 1500 يورو يكون هو الضامن أمام الجامعة إنك هتقدر تكمل دراستك هناك بدون تعثر مادي.
ضامن مصري: بيكون حد من الأهل مرتبه بالمصري يعادل 1500 يورو و بتجيب ورقة تثبت ده من مكان عمله و تبعتها مع ورقك للجامعة.
تقدم علي منحة كاملة في الهيئة الألمانية للتبادل العلمي: عنوانها: 11 شارع صالح أيوب جنب ساقية الصاوي
وماذا عن التقديم على الفيزا؟
املأ الأبليكيشن علي موقع السفارة عشان يتحددلك معاد.
بتحضر معاك شهاداتك والخطاب التحفيزي وخطاب التوصية والسيرة الذاتية بتاعتك وصورة من أول 4 ورقات في الباسبور.
لازم توصل قبل معادك بساعة علي الأقل عشان أحيانا ممكن يندهوا الإسم قبل المعاد.
بتدفع 60 يورو تقديم عالفيزا وبترتب ورقك زي ما هو مكتوب على الشباك.
لازم تقرأ عن الجامعة اللي بتقدم ليها والمدينة الموجوده فيها والمحيط الخارجي بالمدينة دي عشان أسئلة الإنترفيو.
لازم تكون هادئ جدا عشان بعض الأسئلة بتكون بطريقة الضغط العصبي.
الرد بيكون في خلال من 3 لـ 6 أسابيع.
في حالة رفض الفيزا ممكن تطعن فيه وتقدم الطعن للسفارة وممكن تتقبل أولا.
هل من نصائح لتحضيرات السفر والسكن؟
لو متعرفش حد هناك يستقبلك بتبعت للجالية المصرية وهما بيبعتوا حد يستقبلك في المطار.
لازم يكون موبايلك مشحون لإن مسموحلك تفتح نت من المطار لمدة ساعة مجانا.
تكون مرتب أمور السكن في سكن طلبة أو سكن عادي: سكن الطلبة تحجزه بالإيميل قبل ما تسافر و بيكون عليه إقبال كبير فلازم تتأكد إنك اتقبلت فيه أو سكن عادي حد بيحجزهولك من هناك.
ماذا أفعل حين أصل ألمانيا؟
أمام المطار في مكتب استعلامات ممكن تأخد منه خريطة عشان تقدر تتحرك.
تروح مكتب الجامعة تبلغهم بوصولك.
تحضر مكان السكن وتجيب ورقة من المالك تكون معاك.
تقدم لشركة تأمين حكومية عشان تعمل تأمين صحي لطالب.
تروح البنك اللي فيه حسابك المغلق عشان تفعله.
كيف أتعايش في وسط المجتمع الألماني؟
كل السوبر ماركت بتقفل الساعة 8 وموجود سوبر ماركت تركية فيها لحوم حلال.
مواصلاتك كلها مجانا جوه المدينة اللي فيها الجامعة وبين المدن لكن ممنوع القطار السريع.
بعد الساعة 7 مسموح صاحبك يكون معاك في المواصلات مجانا بكارت المواصلات بتاعك.
