أهلي وزمالك في عش الزوجية.. مين جاور السعيد وفريقه خسران بيعمل إيه؟
الزمالك والأهلي، طول عمرنا عارفين إن بينهم صراع ومنافسة، وببيبان أوي في الماتشات، وكمان بين الصحاب، بس يا ترى فكرتوا أيه اللي ممكن يحصل بين المتجوزين؟ «شبابيك»، اتكلم مع أزواج فرقهم مختلفة عن بعض وعاملين أهلي وزمالك في البيت، وهنعرض لكم مواقفهم.
اضطهاد محمد للمياء
«أهلاوية وأفتخر وأعاني من الاضطهاد» بالجملة دي عبرت لمياء شادي، دكتورة صيدلانية، عن معاناتها مع جوزها محمد المشتاوي لأنه زملكاوي متعصب جدا، وبتقول: «أنا كنت فاكرة إننا هنتعايش، ويتقبل الاختلاف، إنما طلع صعب.. لو الزمالك خسر يتعصب عليا حتى لو مش بيلاعب الأهلي، ولما يكسب يمنعني اعبر عن فرحتي بفوز الأهلي في حين أما الزمالك بيفوز بيعمل فرح، ومش بيراعي مشاعري».
لكن محمد المشتاوي، الزوج الزملكاوي، بيقول: «باخدها نادي الزمالك نقضي اليوم، وناكل ونشرب، فتاكل من خير النادي بتاعي، وتطعنه في ظهره، وتشجع الأهلي». وبيدافع عن نفسه من تهمة التعصب وبيقول: «والله براضيها لما الأهلي بيخسر من الزمالك، خصوصا ان دا مبيحصلش كتير».
«لمياء» بتحكي عن موقف حصل بينها وبين جوزها أثناء ماتش للأهلي والزمالك، وتقول: «في مرة الأهلي كسب الزمالك في آخر ثانية، وأنا لا إراديا قولت هييييييييه بعبر عن فرحتي، وهوب لقيت إزازة الميه ف وشي».
«محمد» حب يدافع عن نفسه، وقال: «أنا كنت محرج عليها تحتفل، ولقتها مش بس بتحتفل، وأنا ساكت، دي فضلت تغيظ فيا، وأنا بحاول أبيّن إنه مش فارق، لحد ما حدفتها بإزازة المية.. بس كانت بلاستيك»
وبتحكي «لمياء» وتقول إن جوزها الزملكاوي: «بيفرض على ولاد اخواته الأطفال الأبرياء إنهم يبقوا زملكاوية بالإكراه». لكن رد «محمد» كان جاهز وقال: «لازم أعرفهم طريق الصح، لأن الزمالك أفضل فريق، وهو نادي الصفوة، وريال مدريد مصر، وأنا واثق أني هشجعها تبقى زملكاوية زيي».
نادر ومريم
نادر نبيل وزوجته مريم موريس عكس «لمياء» و«محمد» تماما. يقول «نادر» إن زوجته: «زملكاوية وأنا أهلاوي. لما فرقتي تخسر بتحفل عليا وتتصل بيا لو أنا برة وتفضل تتريق ع الاهلي، بس ده مش بيحصل كتير علشان الأهلي بيكسب ديما، أنا اللي بحفل عليها دايما».
يحكي «نادر»: «عمري ما هنسى لما كنت في شغل في الأقصر والأهلي بيلاعب سموحه واتغلبنا ٣- صفر اتصلت بيا وعماله تضحك وتقولي معلش متزعلش نفسك، وصوتها فرحان، دمي اتحرق، قولت اقفل أحسن».
يرى «نادر» أن الزمالك اللي خسر من سموحة برضو الموسم الحالي أنه «مش ولابد الموسم ده»..
ترد «مريم»: «سنظل أوفياء»، وتقول «لما الزمالك كسب المرة إللى فاتت كان هيقتلنى والله، لدرجه إنى مرضتش أأفور علشان متضربش، لأنه بياخد الموضوع على أعصابه جدا، أما أنا لما الاهلى بيكسب، بيحتفل هو، وأنا بتبارد وبعمل مش واخده بالي».
«نادر» يقول: «يوم فوز الزمالك بيبقى يوم اسود، بعلن الحداد وبمنع الهزار والهرج والمرج لحد تاني يوم، ولما الزمالك خد السوبر، فضلت تحفل وأنا ابينلها إنه مش فارق معانا البطولة دي وعادي، لحد ما قلبت وقولت خلاص نهدي بقي ومنتكلمش في الكورة خالص سكتت ياعيني».
محمود ومنة «عاقلين»
محمود محمد (اسم مستعار) أهلاوي، يقول: «حقنا للدماء، بتجنب معاها أي نقاش عن الكورة، خاصة لما الأهلي يتغلب من الزمالك، باخد بعضي وأدخل أنام».
ومن الواضح ان زوجته منة عادل (اسم مستعار) الزملكاوية، برضو بتتجنبه في الماتشات، وبتقول: «أنا ممكن أضايق وقت الخسارة، بس بحاول مخليش دا يأثر على علاقتنا، وكذلك وقت المكسب، مش بحب أبين لأنه بيزعل فعلا».
