الجو حر والموبايل بيسخن؟.. بالطرق دي هتحافظ عليه
لما الجو بيكون حر وخاصة في فصل الصيف، كتير مننا بيعاني من ارتفاع سخونية الموبيل وممكن نقلق ونخاف على كفاءة الجهاز.
علشان كده هنقدملك مجموعة نصايح تعرفك إزاي تحافظ على موبايلك علشان ميتعطلش وتخسره خالص.
- لما تلاقي موبايلك سخن بشكل مبالغ فيه حاول تحطه في مكان ظل ولو معرفتش على اﻷقل اقفله خالص لمدة ربع ساعة لحد ما تحس أنه برد.
- بلاش في الجو الحر تستخدم الجرابات السيليكون او المطاط وياريت لو تستخدم جرابات ألوانها فاتحة يعني ابعد عن الأسود علشان بيحتفظ بالحرارة.
- احذر إنك تشحن الموبايل وهو سخن سواء بشاحن منزلي أو شاحن محمول (باور بانك) ﻷن فيزيائياً الموبايل وهو سخن بيكون سائل الليثيوم في البطارية متمدد فلما هتيجي توصل الموبايل على الشاحن هتلاقيه بيسخن أكتر والسائل هيتمدد أكتر وهتلاقي البطارية هتتنفخ يا تنفجر في أسوأ الحالات.
- متمسكش الموبايل في إيدك كتير علشان بطبيعة الحال إيدك بتسخن مع حرارة الجو وبتعرق ودا هيخلي الموبايل يسخن بردو والعرق ممكن يدخل في أي منفذ من منافذ الموبايل، ولو هو موبايل مش ضد الماية هيبوظ.
- حاول تخلي استخدامك خفيف للموبايل وانت برا البيت يعني بلاش تفضل مشغل الـ GPS و Bluetooth والداتا طول الوقت، شغلهم وقت ما تحتاجهم وأول بأول اقفل البرامج اللي شغالة في الخلفية عشان متخليش المعالج شغال على طول ويسخن زيادة.
- متعملش ناصح وتحط الموبايل في الفريزر لما تلاقيه سخن، ﻷن انت كدا بتدخل المكونات الداخلية للموبايل في حالة صدمة من سخونة شديدة لبرودة شديدة يبقى متستغربش وقتها لما تلاقي الموبايل مبينطقش أو هنج أو بقى تقيل.
