لو موبايلك اتسرق.. بالخطوات دي ممكن ترجعه
«موبايلي اتسرق وعليه صوري؟» و«إزاي ارجع موبايلي المسروق».. أكيد سمعت صديق أو قريب بيقول جملة من دول؛ ومش بعيد تكون أنت نفسك اللي قولت كده. في التقرير ده هنقولك على 4 خطوات إن شاء الله هينفعوك عشان ترجع تليفونك لو اتسرق أو ضاع منك.
الخطوة الأولى
الخطوة دي باختصار هي تعقب الموبايل والتحكم فيه عن بعد.. وفي الخطوة دي احتمالات رجوع الموبايل أو معرفة احنا نسيناه فين بتكون أكبر (حتى لو النت مش مفتوح).
ياريت كلنا نبدأ نعمل الخطوة دى من دلوقتى عشان نضمن أننا نلاقيه لو - لاقدر الله- حصل حاجة ونقدر نرجع الموبايل:
- هنحمل البرنامج المجاني ده (Lost Offline Free) من «Google Play» للمطور العربي حسن قاسم. ونسطبه على الموبايل
- هيطلب منك أنك تعمل كود سري مميز.. لازم دايما تكون فاكر الكود ده، وحافظه في مكان بعيد عن الموبايل.
- كمان لازم تسيب الـGPS مفتوح على وضع High Accuracy
وبكده الموبايل بقى جاهز إن شاء الله
دلوقتي المفروض أنك تقفل الموبايل بحيث ميشتغلش غير على شريحتك بس.. العملية بأكملها متوقفة على السرعة والخطوة دي:
Settings / Security / SIM Card lock
Settings / Security / Encrypt your phone
خلى بالك إن لازم يكون معاك الـPin code بتاع الشريحة علشان متتسوحش؛ لأنه كل مرة هتفتح فيها الموبايل هيطلب منك الكود
لو لاقدر الله الموبايل اتسرق هتعمل الآتي:
* هتبعت رسالة SMS من أي موبايل تانى لموبايلك اللي ضاع منك فيها الكود بتاعك.
* الموبايل اللي ضاع بيفتح تلقائيا تطبيق خرائط جوجل (Google maps) ويبعتلك رسالة SMS فيها إحداثيات المكان اللي هو فيه بالظبط (بيبعتها طبعا للموبايل اللي أنت أرسلت منه الرسالة).
* بتفتح خرائط جوجل وتدخل الإحداثيات اللي الموبايل بعتها وبيحيبلك المكان بالظبط.
شروط الخطوة الأولى:
- السرعة: بحيث أنك تبعت رسالة الكود بمجرد ما تكتشف أن الموبايل مش فى جيبك.. مش لما تبقى تروح وتبقى تشوف هتعمل إيه.. لأن على ما بال ما تفكر تعمل إيه ممكن الموبايل يكون سافر ليبيا.
- قفل الموبايل على الشريحة: ودا علشان حتى لو اللي لقاه أو سرقه حاول يغير الشريحة أو يشيلها الموبايل يطلب منه أكواد أنت اللي بتحددها (زي ما قلنا فوق)
- سرعة الوصول للمكان اللي الموبايل بعت إحداثياته لأن مفيش حرامي بيستقر فى مكان كتير.
- عدم محاولة الاتصال بالموبايل إلا لما تقرب من المكان اللي اتبعت من الموبايل ودا برضو لتفادي أن اللي سرقه يرمى الشريحة أو يرمي الموبايل تحت أي عربية.
-يفضل جدا أنك تقفل الموبايل عن طريق «Pattern» أو «Password أو Pin Codee» علشان تلهي الحرامي أكبر فترة من الوقت على ما يفتحه.
**ملحوظة**
التطبيق دا موجود منه نسخة مدفوعة بتديك إمكانيات أكبر زي إن الموبايل يفضل يرن وما يقفش غير لما تدخل كود سري
- أو إنك تقفل الموبايل
- أو إنك تمسح كل البيانات اللي عليه
الخطوة الثانية
طريقة أطول شوية بس برضو في احتمال كبير إن الموبايل يرجع إن شاء الله:
- هتعمل بلاغ فى قسم شرطة بواقعة السرقة مع ذكر موديل الهاتف والرقم المسلسل للموبايل IMEI في البلاغ. رقم IMEII دا (اللى الناس بتقول عليه ظلما وبهتانا «السيريال نمبر») بنجيبه من على العلبة أو دخل الكود دا فى الموبايل (#06#*)
- هتطلب قرار من النيابة العامة بتتبع الهاتف المذكور في بلاغ الشرطة.. (القرار بيتحول للمرفق القومي لتنظيم الإتصالات).
- قرار التتبع بيحتاج موافقة المرفق القومي لتنظيم الاتصالات «NTRA» وله فرعين:
1- شارع المخيم الدائم فى مدينة نصر
2- القرية الذكية
المرفق بيديك ورقة التتبع من 3 نسخ. هتروح للمراكز الرئيسية للـ3 شركات مقدمة الخدمة في مصر، وتسلم خطابات التتبع الصادرة للموبايل دا (بنفسك).
**ملحوظة**
للأسف ممكن تحتاج معارف وناس واصلة لتسريع الإجراءات.
- غالبا اللي سرق الموبايل بيبيعه في أقرب فرصة أو بيركب عليه شريحة تانية، وفي كل الأحوال المشتري الجديد أو الحرامي بيشغل شريحته على الموبايل؛ وهنا الشركة مزودة الخدمة (أيا كانت) بتبلغ الشرطة باسم المستخدم الجديد للموبايل.
- الشرطة بتبعت جواب لعنوان الشخص اللي اشترى الموبايل، وبيقولوله فيما معناه إما إنك تسلم الموبايل أو هنقلب المحضر لقضية ونجرجرك في المحاكم.
وهنا بيضطر المشتري الجديد إنه يسلم الموبايل عشان الموقف لا يتطور قضائيا
المفروض إن الشرطة بتراسلك أو بتكلمك عشان يبلغوك إن الموبايل عندهم وأنت بتروح تاخده بقى.
واخد بالك من الخطوات اللي فيها «المفروض» دى؟.. تمام
الخطوة الثالثة
ودي هتستخدم فيها خدمة جوجل بتقدمها من زمان عشان تلاقي موبايلك المسروق
- على موبايلك الأندرويد ادخل على:
Settings / Security / Device administrators
- هتلاقى حاجة إسمها Android device manager
- اختارها واختار منها Activate
- ادخل على الجزء بتاع الـAccounts على الموبايل
- اختار Google
- هتلاقى خيار Location اختاره
- اسمح لجوجل إنه يوصل لمكانك عن طريق تفعيل خيار Access my location
- خلى الـLocation Mode على وضعية High accuracy
بعد كده، لو الموبايل ضاع منك ادخل على اللينك ده وسجل دخولك بأكاونت جوجل اللي أنت شغال بيه على الموبايل..
هتلاقى خيارات كتير منها إنه يحدد مكان موبايلك على الخريطة (Locate)، أو يشغل جرس الموبايل لمدة 5 دقايق (Ring)، أو يمسح كل اللي على الموبايل (Erase)، أو يقفل الموبايل (Lock)
الخطوة الرابعة
و دى عشان لو معملتش الخطوات اللي فوق دي؛ ودى بتبوظ الموبايل حرفيا وبتخليه مجرد حتة حديدة، والاستفادة الوحيدة بتكون إنك بتدى للي سرق الموبايل خازوق لذيذ وتخليه ميعرفش يستفيد من الموبايل ولا يبيعه؛ ودا لأن الـIMEI بتاع الموبايل بيتمنع من استخدام أي شبكة اتصالات فى مصر، حتى لو أنت لقيته بعدها ورحت مقر الشركة بنفسك.
- من دلوقتي دخل الكود دا فى الموبايل #06#*
- هيظهر السيريال نمبر بتاع جهازك
- احفظه بعيد عن الموبايل فى ورقة فى محفظتك أو مع حد تثق فيه أو مع حد من أهلك!!
مجرد ما الموبايل يتسرق كلم شركة الاتصالات وأديهم الرقم وشركة الاتصالات بتعمل إغلاق Block كامل للجهاز.. حتى اللي سرقه لو حط فيه شريحة تانية مش هيشتغل خلاص، وبكدا تكون فشيت غلك فى اللي سرق الموبايل وبوظت موبايلك بنفسك.
الشريحة
نيجى بقى لحتة الشريحة وإزاي تطلعها بنفس الرقم لو معرفتش تجيب الموبايل لا قدر الله
- هتروح لأي فرع من فروع الخدمة اللي تبع الشبكة بتاعتك ومعاك علبة الخط أو رمز الـPUK اللي مكتوب على الكارت اللي فيه الشريحة.
- لو مش موجودة، هتروح بصورة البطاقة اللي متسجل بيها الخط، وبيطلعولك الشريحة.
- لو شاري الخط من حد وكان متسجل ببطاقة تانية هيدولك ورقة ويقولولك اكتب رقم الموبايل وأكتر 5 أو 7 أرقام كلمتهم آخر أسبوعين، لذلك لازم تكون حافظ الأرقام دي أو مسيفها على موبايل تانى أو نوتة تحسبا للظروف دي.
- لو تعرف موظف فى فرع الخدمة هيجيبلك الشريحة الجديدة من غير ما تعمل كل دا، من غير ما تروح فرع الخدمة
