مسلسلات رمضان.. لأن «الجواب بيبان من عنوانه» هذه الأعمال تستحق المشاهدة
انطلق سباق دراما رمضان 2017، بعدد كبير من المسلسلات، وابتدت الناس تسأل على الأعمال الحلوة اللي ممكن يتابعوها.
ولأن «الجواب بيبان من عنوانه».. في التقرير ده جمعنالكم المسلسلات اللي حلقاتها الأولى بتقول إنها هتكون من أبرز الأعمال في رمضان السنادي.. وده كان واضح من ردود الأفعال والتعليقات على مواقع التواصل الاجتماعي.
حلاوة الدنيا
الجواب الحلو في مسلسل «حلاوة الدنيا» كان باين من أول التتر اللي بتغنيه الفنانة شيرين، اللي دخلتنا في حالة المسلسل اللي محور الأحداث فيه أمينة، اللي بتستعد لزفافها وفجأة بتكتشف أنها مصابة بالسرطان. واختيار «شيرين» في حد ذاته اختيار موفق لأنها بتغني بإحساس عالي.
مع أحداث الحلقة الأولى بنكتشف اننا قدام قصة مختلفة هيكون فيه جرعة من الحب من خلال هندي صبري «أمينة» وهاني عادل، وبتبدأ الأحداث في إثارة اسئلة تخليك مرتبط بالمسلسل لما «أمينة» بتروح المستشفى تعمل تحاليل طبية وتكتشف أن عمها شغال في نفس المستشفى.. ما يعني أن علاقتها بعمها ضعيفة.. وده يخليك عايز تعرف السبب؟
سماء عبد الخالق وإنجي القاسم وهما كتاب السيناريو والحوار للمسلسل، مستنوش كتير، ومن الحلقة الأولى خلونا نكتشف إصابة «أمينة» بالسرطان؟ وده يخلينا نسأل هاني عادل، اللي بيقوم بدور خطيبها هيعمل إيه بعد لما يعرف اصابة خطيبته بمرض السرطان؟
طبعا وجود ظافر عابدين في المسلسل، بيخلي المشاهد يتوقع انفصال هند صبري وهاني عادل خلال أحداث المسلسل، فهل التوقع ده صح.. ولو ده صح هيتم إزاي.. واسئلة تانية إثارتها بيخلي المشاهدين يتعلقوا أكتر بالمسلسل، وهيجذب مشاهدين جدد ليه خلال الأيام الجايه.
لاتطفيء الشمس
البرومو الخاص بالمسلسل كان بيقول إنه هيكون عمل مميز، وده كان واضح من الصورة اللي شبيهة بالحلم والموسيقى اللي عزفها لينا أمين بو حافة وصوت محمد الشرنوبي الجميل وهو بيغني.. وده نفس اللي وصل للمشاهدين من الحلقة الأولى
المسلسل من حلقته الأولى واضح أن مختلف عن القصص اللي شوفناها السنوات اللي فاتت والسنة دي كمان في بعض الأعمال.. كل شخصية متقمصة الدور بشكل جذاب وضايفة عليها روحها الخاصة بيها المختلفة عن الصورة اللي ارتبطت في ذهننا للأبطال في الفيلم اللي سبق وشوفناه كلنا.
لأعلى سعر
من الحلقة الأولى من المسلسل بنلاحظ أن دور نيلي كريم في «لأعلى سعر» يختلف تماما عن دورها في مسلسل «سقوط حر» اللي جسدته السنة اللي فاتت واللي قبلها كمان وكلها كانت الشخصية اللي بتلعبها بيغلب عليها الطابع الكئيب.
اللي اتفرج على الحقة الأولى هيلاحظ أن كتابة كل شخصية في العمل متماسكة أبعادها النفسية والجسدية والاجتماعية واضحة متحسسناش أن فيه خلل في تركيبة الشخصية تخلينا حاسين بالملل واحنا بنتفرج. والاختلاف ده ظهر من أول حلقة من خلال أبطال العمل والعلاقات اللي بتربطهم ببعض سواء علاقة زينة بنيللي أوعلاقة أحمد مجدي بسارة سلامة.
والعلاقات ديه من أول حلقة بتطرح كذا تساؤل غامض عند المشاهد وطرحها للتساؤلات ديه كان السبب في أن المسلسل ده الناس تتابعه وتعرف ايه اللي هيحصل بينهم وكان السبب برضه في أني أقول العمل الحلو بيبان من أول طلة.
كفر دلهاب
الغموض والرعب والاثارة اللي بدأ بيها تتر مسلسل «كفر دلهاب» كفيلة إنها تجذبنا نتفرج على باقي حلقات المسلسل ونشوف عالم «كفر دلهاب» اللي أهله بيشتغلوا في السحر والشعوذة عامل ازاي. ونشوف دور يوسف الشريف اللي عودنا انه بيقدم أدوار تركيبتها مختلفة.
والجذب ده واضح بشكل كبير من نسبة مشاهدة الحلقة الاولى اللي وصلت لـ700 ألف مشاهدة على موقع اليوتيوب فى أقل من عشر ساعات.
هذا المساء
فيه مخرجين بتبقى عارف انهم مخرجين متميزين وبتبقى مستني أي يعمل يعملوه عشان تتفرج عليه لأنك واثق انهم مش هيخيبوا ظنك.. ومن المخرجين دول المخرج تامر محسن، اللي سبق وشوفنا ليه مسلسل تحت السيطرة، وبدون ذكر أسماء.
«محسن» مخيبش ظننا في أول حلقة من مسلسل «هذا المساء» اللي فيه مجموعة من النجوم كل واحد منهم يشدك انك تتفرج عليه بداية من اياد نصار مرورًا بأروى جودة لمحمد فراج لحنان مطاوع وغيرهم واللي واضح أننا هنستمتع بالمشاهد ما بينهم طوال الـ30 حلقة.
واحة الغروب
المسلسل قدر من أول ثانية يجذب المشاهد ويخليه متعلق بالعمل من خلال المشهد الاول اللي بيضرب فيه الاحتلال الإنجليزي الإسكندرية، بعد فشل الثورة العربية.
أحداث المسلسل المأخوذ عن رواية «واحة الغروب» لبهاء طاهر، بتدور في القرن الـ19، والعمل من حلقته الأولى قدر انه ينقل المشاهد للفترة الزمنية دي، ويدفعنا لمعرفة قصة الضابط خالد النبوي، المتزوج من آيرلندية، اللي هيتم نقله لواحة سيوه.. يا ترى إيه اللي هيحصل مع الضابط المؤيد للثورة العرابية اللي فشلت.. ده سؤال هيخلي كتير من المشاهدين يتابعوا المسلسل.
