رئيس التحرير أحمد متولي
 تعرّف على «ألطف الكائنات» في دراما رمضان 2017

تعرّف على «ألطف الكائنات» في دراما رمضان 2017

كل رمضان بتفاجئنا الأعمال الدرامية بعدد كبير من الوجوه الشابة الجديدة، ومنها السنادي مجموعة من البنات يعتبروا ألطف الكائنات في دراما رمضان 2017 لأنهم قدروا يجذبوا الناس ليهم من أول ظهورهم. في التقرير ده من «شبابيك» هنتعرف على كل واحدة فيهم. 

أسماء أبو اليزيد

«أسماء» عضوة في فرقة «بهججة» الغنائية

من الطلة الأولى ليها في مسلسل «هذا المساء» جذبت المشاهدين لشخصية «تقى» اللي بتجسدها. «تقى» اللي عايشة حالة من الخوف والقلق والرعب من شخص مجهول بيطاردها. وقدرت «أسماء» بأداء تمثيلي متمكن إنها تخلينا نعيش معاها الحالة دي.

وموهبة «أسماء» في التمثيل ظهرت من زمان جدًا من أيام ما كانت بتمثل في فرقة أتيليه المسرح بكلية فنون جميلة اللي متخرجة منها وقدمت من خلال الفرقة مجموعة من العروض منها عرض «أوبريت الدرافيل» ولسة بتقدم عروض مسرحية لحد دلوقت منها العرض اللي قدمته مؤخرًا على مسرح الهناجر بعنوان «الخلطة السحرية للسعادة». و«أسماء» مش بس بتمثل لأ دي كمان بتغني في فرقة «بهججة» الغنائية اللي بتقدم مجموعة من الأغاني والمونولوجات اللي بتتميز بالمرح والبهجة. 

مريم الخشت

الحس التمثيلي عند «مريم» بدأ من خلال عالم الدوبلاج الصوتي

بملامحها الجميلة قدرت إنها تاخدنا نعيش وياها شخصية «شهيرة» اللي بتجسدها في مسلسل «لا تطفيء الشمس» المأخوذ عن رواية إحسان عبد القدوس. وخلتنا نستمتع بالعلاقة الرومانسية اللي بينها وبين محمد ممدوح.

وشخصية «شهيرة» سبق وجسدتها نادية لطفي في الفيلم المأخوذ عن الرواية، لكن «مريم» قدرت إنها تدي للشخصية طابع خاص بيها مختلف في روحه عن شخصية «شهيرة» في الفيلم. الحس التمثيلي عند «مريم» بدأ من خلال عالم الدوبلاج الصوتي اللي قامت فيه بدبلجة عدة شخصيات مع شركة «ديزني» ومنهم شخصية «ويندي» في فيلم «بيتر بان»، و«كوليت» في فيلم «خلطبيطة بالصلصة»، و«نيتا» من فيلم «أخي الدب ٢».

مها نصار 

«مها» في الأصل راقصة باليه وعارضة أزياء

​​​​​​طريقة كلامها اللي فيه مزج بين الرزانة، والحكمة، وخفة الدم، والرقة خلت الواحد مستمتع وهو بيتفرج على مها نصار اللي بتجسد دور «نعمة» الجارية في مسلسل «واحة الغروب». ويستمتع طبعًا بالحوارات اللي بتجمعها مع محمود عبد الظاهر. ودور «نعمة» فكر بعضنا بدور «جوهر» الجارية في مسلسل «حديث الصباح والمساء» وبالعلاقة اللي كانت بتجمعها مع داوود باشا اللي قام بدوره خالد النبوي برضه.

بس الحقيقة «نعمة» فيها حيوية أكتر من «جوهر» وبتاخد وتدي في الكلام بكل مرونة مع محمود على عكس جوهر وده يدل على إنها ممثلة جيدة. «مها» في الأصل راقصة باليه وعارضة أزياء وفي نفس الوقت التمثيل كان شاغل بالها من زمان وأول تجاربها التمثيلية كانت في مسلسل «اغتيال شمس» و«بفعل فاعل» بس مسلسل «واحة الغروب» يعتبر الانطلاقة المميزة اللي الناس عرفتها من خلالها. 

ودور «نعمة» كان مفروض تجسده بنت بشرتها سمراء ومها كانت بشرتها قمحاوية بس المخرجة كاملة أبو ذكري شافت أنها هتقدر تجسد الشخصية بشكل جيد فقالتلها لو المكياج الغامق طلع عليكي حلو هتاخدي الدور وفعلًا فازت مها بالدور وده اللي سبق وصرحت بيه في موقع «في الفن».

ركين سعد 

«ركين» شاركت في مسلسل «سمرقند» وأدت فيه دور«الأميرة خاتون أتون»

موهبة تمثيلية أردنية متميزة يمكن البعض مننا مسمعش عنها قبل كده لكن كلنا استمتعنا بتجسيدها لدور «مليكة» الفتاة المتمردة في مسلسل «واحة الغروب».

والعمل ده يعتبر أول عمل تجسده في مصر وهي سبق وشاركت في أعمال سينمائية ومسرحية ودرامية ولكن برا مصر ومن الأعمال الدرامية اللي شاركت فيها مسلسل «عمر» اللي جسدت فيه دور «أسماء بنت أبي بكر»، والمسلسل التاريخي «سمرقند» اللي أدت فيه دور«الأميرة خاتون أتون». 

سلمي أبو ضيف 

«سلمى» عارضة أزياء واشتغلت مذيعة راديو

نموذج الأخت الصغيرة اللي بتقعد تغلس على أختها الكبيرة وتتخانق معاها وترجع تصالحها بطريقتها الخاصة اللي مليانة شقاوة، دور أجادت تمثيله «سلمى» من خلال تجسيدها لدور «علياء» أخت «أمينة» في مسلسل «حلاوة الدنيا» اللي بتدعمها بطريقة ايجابية عشان تقدر تعدي محنة اصابتها بمرض السرطان.

«سلمى» أصلًا عارضة أزياء واشتغلت مذيعة راديو ومثلت في كليب شيروفوبيا لـ«مسار اجباري». ورمضان ده كان وش السعد عليها من ناحية أنها تشق طريقها في مجال التمثيل من خلال عمل «حلاوة الدنيا» وكمان «لا تطفيء الشمس». 

رغدة جلال الدين

رغدة جلال الدين

صحفية مصرية تكتب في المجال الفني، إلى جانب كونها ممثلة ومغنية بفرقة «بهججة»