قبل ما تروح الجيم.. تعرّف على أجهزة الكارديو
كتبت- هديل شعيب:
بعد ما تقرر تنزل الجيم لازم تتعرف كويس أوي على الآلات اللي هتدرب عليها عشان متروحش على عماك، وترحم نفسك من الفتى والأسئلة الكتير.
في الجيم هتلاقي أجهزة «الكارديو» وهي اللي هتستقبلك من أول وهلة ودا لأنك هتحتاجها للتسخين قبل اللعب وكمان لو أنت محتاج بس تحرق دهون فأنت ممكن تلعبها لوحدها.
يعنى أيه أسخن؟
أول حاجة هيطلبها منك الكابتن إنك تسخن قبل ما تلعب باستخدام أجهزة الكارديو من 10 إلى 15 دقيقة.
فوائد التسخين
ينصح كابتن مصطفى شحاتة، مدرب لياقة بدنية، بالتسخين قبل ممارسة أي رياضة، وأي مجهود عضلي أو بدني لأنه بيقلل من نسبة الإصابات، كمان بينبه العضلات للمجهود اللي هتقوم بيه في التمرين وبيهيئها.
الكارديو بتعمل أيه؟
ممكن تلعب أجهزة الكارديو لوحدها لو أنت عاوز تنزل وزنك، لأنها بتساعدك على حرق الدهون وتنشيط عضلات أطرافك بشكل عام وبتنشط الدورة الدموية فى جسمك، وبتزود سرعتها تدريجياً كل خمس دقائق على حسب قوة تحملك من ربع ساعة لنص ساعة لكل جهاز.
قبل ما تبدأ أي تمرينة لازم قبلها تسخن يعني تهيء جسمك بالتدريج على المجهود اللي هتقوم بيه، ما ينفعش تدخل تتمرن علطول وتشيل أوزان مرة واحدة كدا ممكن يجيلك تمزق في العضلات.
treadmill
المشاية من أسهل الأجهزة اللي هتتعامل معاها في الجيم، وبتساعدك على حرق كمية كبيرة من الدهون وبتنشط جميع عضلات الجسم لأنك بتمارس من خلالها رياضة المشي والجري، وبتساعد على تنظيم التنفس عندك وكمان بتخليك ماتكسلش لأنك بتجري في مكانك فبتحس أنك مش بتقطع مسافة كبيرة.
أنت اللي بتتحكم في سرعتها وكمان بتختار بين المشي والجري، وكمان نازل منها إصدارات جديدة بتخليك تعرف نبضاتك وضغطك ولعبت كام دقيقة وحرقت قد أيه من الدهون ومشيت كام كيلو متر.
Orbitrac
من الأجهزة اللي مش هتستظرفها في الأول كمبتدئ وبيعتمد أكتر على تحريك إيديك ورجليك. وأحسن طريقة نصح بيها كابتن مصطفى شحاتة هي طريقة التدرج السريع بتساعدك جداً على ليونة المفاصل وإحماء عضلات الجسم، وتحسين نسبة امتصاص الأكسجين في الجسم وحرق السعرات الحرارية.
أنت اللي بتتحكم في سرعته على حسب سرعة إيدك ورجلك أو إنك بتخليه يشتغل أوتوماتيك لوقت أنت بتختاره.
Bike
أكتر جهاز هتحبه لو أنت بتحب ركوب العجل كأنك راكب عجلة بس ثابت في مكانك.
كابتن مصطفى شحاتة قال إنه جهاز بيركز أكتر على كل عضلات رجلك زي عضلة السمانة والعضلة الضامة والعضلة الخلفية والأمامية وبتساعدك على التخلص من الدهون في منطقة الأجناب. وهو جهاز لطيف وأكتر جهاز تستمتع بيه وأنت بتسمع أغنيتك المفضلة.
