عايز تعرف معنى الحب؟.. الأطفال دي هتعرفك وتفرحك
الحب: هو الشعور الوحيد اللي محدش قدر ولا هيقدر يحطله تعريف محدد، يمكن علشان كل واحد بيحس بيه بطريقته وبيعيشه في جو مختلف عن التاني؛ لكن اللي كله متفق عليه إن الحب هو أكتر إحساس بنتمناه ومبنبقاش عايزينه يخلص.
الحب هنا مش المقصود بيه المشاعر الحلوة بين ولد وبنت بس، إحنا ممكن نقصد بالمعاني الحلوة دي كل علاقاتنا: بأصحابنا وأهلنا وكل الناس اللي بنخاف عليهم.
«مش بأزهق معاك.. بأضحك ومبسوط»، ده كان رد طفل على عمه لما استغرب إنه قاله بحبك، خصوصا إن العلاقة بينهم مش كده خالص.
مواقف كتير بتعبر عن الحب الصادق بتطلع من أطفال وبطريقة عفوية، وبدأ رواد موقع التواصل الاجتماعي فيس بوك يتكلموا عن مواقف وتعبيرات الحب مع أطفال قرايبهم بعد ما نشر أحمد مدحت موقف على صفحته وفتح المجال لناس كتير إنها توصف الحب من خلال مواقف مختلفة في الحياة.
معظم المواقف كانت من الأطفال، واللي عبروا عن الحب بتصرفات تلقائية جدا منها:
فدوى أحمد، بتحكي موقف بينها وبين بنتها اللي عندها 8 سنين بتقول إنها كانت بتصورلها فيديوهات كتير وهي عمرها شهور عشان تبقى ذكرى جميلة لما تكبر، ولما شافت الفيديوهات عيطت كتير جدا وقالتلها انتي طول عمرك بتحبيني، أنا بحبك ومش عايزه أسيبك أبدا.
إحساسك لما أختك الصغيرة تطبطب عليكي، بتوصفه سارة صالح، في تعليق ليها على البوست، وبتقول إن أختها دخلت عليها لاقيتها بتعيط، فمسحت دموعها وقالتلها في حد مزعلك؟ ساعتها عرفت يعني إيه حنية ومعنى إن يبقى ليها أخت، وكمان لما تبقى مضغوط ومدايق بسبب الشغل وتلاقي حد يقولك مين اللي مزعلك وأنا هجيبله الظابط، ده بينسيك كل الهموم
البؤس من أكتر المشاكل اللي بيعاني منها كتير مننا، بس لما ابن أخوكي يدخل عليكي يقعد جنبك ساكت وبعدها يقولك افردي وشك كده أحلى، أكيد هتنسي كل الحزن، وده اللي حصل مع هبة تمام.
مش كل الأطفال ملايكة زي ما انتوا فاهمين، ممكن برضو الكائن الملائكي ده يفاجئنا برد فعل مش متوقع خالص.
مواقف كتير الأطفال بتتصرف بفطرتها الطيبة وبتحاول تخرجك من حزنك لو حست إنك متغير وده اتكرر مع ناس كتير، لدرجة إنهم مقدروش يعبروا أو يردوا على المواقف دي
