بتجهز لفرحك والتكلفة عاليه؟.. دليلك للتوفير ومش هيفوتك كتير

زيادة الأسعار بشكل مستمر بتخليك كعريس متلخبط، وبيعمل خلل في الميزانية اللي كنت عامل حسابك عليها، وحاجة زي كده أكيد هتعملك أزمة شديدة بس زي ما بيقولوا دايمًا كل عقدة وليها حل. 

فكر مع خطيبتك

موضوع معقد زي التعامل زيادة الأسعار مينفعش تفكر وتاخد قرار فيه لوحدك ولازم تتكلم مع خطيبتك وتتشاركوا انتوا الاتنين في حل الأزمة دي لأن لو خدت قرارات من دماغك وجيت بلغتها بيها أمر زي ده أكيد هيضايقها.

وحاجة زي كده بيأكد عليك صاحب مبادرة «اتجوزوا ببساطة» كريم الدمياطي، وهي أنكم تتفقوا سوا هتعملوا ايه. لأن أكيد هتلاقي عندها أفكار وأنت كمان هيكون عندك أفكار لحل الأزمة فهتحط أفكارك على أفكارها وتطلعوا بحل.

ورقة وقلم

اتفقتوا خلاص أن أنتوا لازم توقفوا جنب بعض عشان الأزمة تتحل؟ يبقى كريم الدمياطي بيقولك تطلع ورقة وقلم وتكتبوا فيها كل حاجة انتوا عايزين تجيبوها، بس مش أي حاجة وخلاص، لأ الاولويات بس اللي محتاجينها في البيت، يعني أي حاجة ثانوية بلاش منها في الفترة دي.

ايه هي الأولويات؟

مؤسس مدرسة «اتجوز صح» أحمد وجيه بيقولك إن الأولويات زي غرفة النوم، وغرفة المعيشة اللي بتستقبل فيها الضيوف واللي بيكون فيها صالون أو أنتريه. وطبعًا مش لازم تجيب الصالون والأنتريه سوا لأ ممكن تجيب حاجة واحدة بس منهم.

والمطبخ اللي هتحط فيه الحاجات الضرورية اللي هتستخدموها ومتجبش أي حاجة مش هتكون ضرورية زي مثلًا الميكرويف لأن ده شيء يعتبر من الرفايع مش من الأساسيات عشان كدة مش لازم يتجاب.

والأحسن توفر فلوسه وتشتري حاجة أهم. وبرضه مش لازم تجيب تكييف ممكن تجيب مراوح في البداية وبعدين لما تتيسر الأمور تبقى تجيب.

أماكن شراء الأولويات

زي ما كتبتوا انتوا محتاجين ايه ضروري، اكتبوا برضه أنتوا هتجيبوا الحاجة دي منين، وبينصحك كريم الدمياطي انك تجيب كل حاجة من الأماكن الرخيصة واللي بيكون عليها تخفيضات ومتبصش على الأماكن اللي بتكون حاجتها وسعرها عالي وده عشان الميزانية تقضي أنك تشتري الحاجة واللي كمان مش بس هتقضي دي هتفيض وهتلاقي نفسك معاك فلوس زيادة تقدر تجيب بيها برضه الحاجات الضرورية اللي محتاجها وده لأنك اخترت تشتري من أماكن أسعارها رخيصة.

سؤال المقربين عن الأماكن

عشان تعرف الأماكن دي ممكن تكتب برضه لستة بالناس المقربين منك اللي حابب تسألهم واللي شايف انهم هيفيدوك لأن ممكن يطلع واحد تعرفوا يعرف شخص عنده مصنع ملابس بيبيع الحاجة بسعر رخيص ففي الحالة دي هيفيدك وهتقدر تروح المصنع انت وخطيبتك وتجيب لبس كويس بسعر معقول.

حاجات مستعملة

وبرضه فيه اقتراح انك تشتري حاجات مستعملة زي مثلًا ترابيزة وطبعًا سعرها هيكون معقول جدًا مقارنة بترابيزة لسة جديدة. واللي بيعمل حاجة زي كدة موقع Olx  اللي بيكون عليه حاجات مستعملة تقدر تشتريها.

وغير الموقع ممكن برضه تسأل الناس المقربة منك عن الأماكن اللي بتبيع الحاجة المستعملة وأكيد هتوصل لكذا اختيار. ودايمًا اسأل الناس عشان توصل لحلول لأن ممكن لو فكرت لوحدك متوصلش لحاجة وده ممكن يخليك تضايق وتتخنق.

التعامل مع زيادة الأسعار

عبد الرحيم ربيعي طالب بكلية الآداب جامعة السوهاج بيقول من واقع تجربة إرتباطه في ظل زيادة الأسعار، اعتمد على نفسه في دهان الشقة بتاعته واتعلم ده من خلال اليوتيوب وطبعًا ده وفر معاه فلوس كتير ودي حاجة بتقولك انك تقدر تعمل زيه وتوفر برضه على نفسك فلوس كتير وممكن لو حد من لستة المقربين بيعرف يرسم حلو أو يعرف حد بيعرف يرسم تطلبه أنه يجي يعملك رسومات مختلفة على الحيطة وبكدة تكون وفرت برضه. 

فرح على قد الإيد

أكيد لو كنت عامل حسابك تعمل فرح قبل ما يحصل موضوع زيادة الأسعار فدلوقت أكيد بتفكر هتعمل ايه؟ وعشان تحل الموضوع ده بسهولة، بدل ما تعمل فرح ممكن تكتفي بانك تعمل كتب كتاب وتأجر مثلًا فرقة تستناك على باب القاعة وتزفك أنت وعروستك لو أنتوا حابين كدة، وتتفق مع فوتوجرافر ياخد ليكوا صور من أول اليوم.

وكمان تقدر تسافر تقضي شهر العسل من خلال أنك تشوف برضه الأماكن السياحية اللي أسعارها معقولة وتسافر هناك تقضي أسبوع مثلًا وبكده الفلوس اللي كنت هتدفعها كلها في الفرح أديك وفرتها وعملت بيها كذا حاجة.