لطلاب الثانوية.. شروط الالتحاق بمعهد الفنون المسرحية
كل لما تتفرج على ممثل أو ممثلة في أي عمل فني بتقعد تسرح بخياك كدة وتتخيل أنك بتمثل معاهم وشايف أن بعد لما خلصت الثانوية أنك عايز تدخل المعهد العالي للفنون المسرحية قسم تمثيل عشان تقدر تحقق الحلم ده.
بس مش عارف ايه المطلوب عشان تقدر تقدم، احنا بقى هنقولك كل اللي مطلوب منك وألف مبروك على القبول في المعهد مقدمًا.
عن المعهد العالي
المعهد العالي للفنون المسرحية هو معهد حكومي تابع لوزراة الثقافة مدة الدراسة فيه بتكون 4 سنين، والشهادة اللي بتاخدها بتكون معتمدة من وزارة الثقافة والتعليم العالي.
المعهد فيه 3 أقسام
- تمثيل واخراج
- دراما ونقد مسرحي
- ديكور
نقطة مهمة بالنسبة للتنسيق
قبل ما نبدأ في شرح المطلوب لازم تعرف أن المعهد العالي للفنون المسرحية غير خاضع للتنسيق والتقديم ليه بيكون بشكل مباشر لما يتفتح باب التقديم في آواخر شهر اغسطس غالبًا يوم 20 لغاية يوم 5 سبتمبر وباب التقديم بيكون مفتوح أسبوعين وبتروح تشتري ملف التقديم من مقر المعهد.
وبتبدأ تجيب صور من الأوراق المطلوبة وبعدين تبقى تسلم الملف وتبدأ تدخل في الأختبارات الخاصة بقسم التمثيل والإخراج. والاختبارات بتكون في النص الأول من سبتمبر والدراسة في أول أكتوبر. ولازم كمان أول ما التنسيق يبدأ تقدم ملفك في أي كلية وده عشان تضمن مستقبلك لأن ممكن متقبلش في المعهد لأي سبب من الأسباب.
ولو قبلت في المعهد بتروح تسحب ملفك اللي فيه أصل الورق اللي كان مطلوب منك من الكلية اللي قدمت فيها وبتوديه المعهد.
شروط القبول في المعهد
عشان تتقبل في المعهد لازم تكون حاصل على نسبة 55% في الثانوية العامة وكمان تعدي من الاختبارات الخاصة بقسم التمثيل والاخراج. وجيب ليهم الورقة اللي تثبت موقفك من التنجيد من مكتب التنجيد يعني هل أنت عندك اعفى منه ولا لسة مجاش الدور عليك ولا ايه.
حاجة كمان إن سنك لازم انه ميتعداش الـ22 سنة لو انت حاصل على الشهادة الثانوية، عشان تقدر تقدم في المعهد العالي للفنون المسرحية.
اختبار دخول قسم التمثيل والاخراج
المعهد مفيهوش قسم تمثيل فقط والقسم بيكون فيه تمثيل واخراج وديه حاجة كويسة على المستوى الفني انك تتعلم الاخراج برضه ويكون عندك خبرة فيه بجانب التمثيل.الاختبار لدخول القسم بيكون عبارة عن اختبارين، الأول هو مشهدين بتمثلهم قدام اللجنة، مشهد منهم بيكون باللغة العربية الفصحى والمشهد التاني بالعامية.
وبعد كدة بيتم تصفية الناس اللي عملت المشاهد بشكل جيد وبيدخلوا في اختبار تاني والاختبار ده عبارة عن ورشة لمدة أسبوع بيدخل فيها كل دكتور من دكاترة المعهد يدربوا الممثل على مجموعة من الأدوات التمثيلية والتدريب ده بيتم تطبيقه على المشهد اللي سبق والممثل جسده قدام اللجنة.
وبعد الورشة ما تخلص الدكاترة بتقعد مع بعضها وبتختار المجموعة اللي أدائها كان متميز خلال الورشة.
ورشة للتدريب على المشاهد التمثيلية
عشان تمثل المشاهد بشكل جيد قدام اللجنة ده محتاج منك أنك تاخد ورشة تمثيل تؤهلك لإجتياز الاختبار الأول بنجاح. وفيه أماكن بتعمل ورش تقدر تروحها وتستفسر منها على مواعيد الورش ديه زي ستوديو عماد الدين، وكيان آرت. ومن الأفضل انك تبدأ تدور على الورشة من دلوقت عشان تكون جاهز ومش مضغوط في الوقت لأن الاختبارات زي ما سبق وقولت أنها بتكون في النص الأول من شهر سبتمبر.
الورق المطلوب
صورة شهادة المؤهل وشهادة الميلاد والبطاقة و4 صور شخصية، وأنت بتجيب الصور بس لأني زي ما قولت ليك في البداية أنك بتودي أصل الورق في الكلية اللي قدمت ليها من خلال مكتب التنسيق ولو قبلت في المعهد بتجيب أصل الورق من الكلية وتوديه المعهد.
المصاريف
رسوم ملف التقديم اللي هتاخده من المعهد 350 جنيه، أما مصاريف الدراسة في السنة الواحدة هتكون حوالي 1000 جنيه.
عنوان المعهد
المعهد ليه مقرين المقر الرئيسي موجود في الجيزة والتاني في اسكندرية بس اسكندرية فيها قسم واحد بس وهو قسم التمثيل والأخراج، والأقسام التلاتة موجودة في القاهرة.
عنوان المعهد في الجيزة
منطقة الهرم، شارع خاتم المرسلين، محطة ونبي، أكاديمية الفنون، بجوار قاعة سيد درويش قريب من محطه مترو ضواحي الجيزة.
عنوان المعهد في اسكندرية
لوران على البحر، سان ستيفانو، قصر الأميرة فايزة.
طرق التواصل
المعهد ليه رقم أرضي 35613233 بس الرقم ده ممكن لما تتصل بيه ميردش والأفضل طبعًا انك تروح المعهد بنفسك لما يتفتح باب التقديم عشان تستفسر عن الحاجة اللي عايزها وفي وسيلة تانية تقدر تستخدمها وهى صفحة المعهد على الفيس بوك من هنا ومن خلال الصفحة تقدر تسأل على أي حاجة أنت عايز تعرفها وهيتم الرد عليك في أقرب وقت.
