ياللي في البحيرة.. استمتع بعروض الأوبرا وقصور دمنهور و«سينما بانوراما»
كل الناس مصدقت تاخد الأجازة من بعد الإرهاق اللي مرت بيه سواء في شغلها أو دراستها. لكن أهل وزوار البحيرة بالخصوص الموضوع ده عشانهم، لأننا محضرين فيه خروجات فنية مختلفة سواء للسينما أو للمسرح، وده لو قررت أنك تقضي أجازتك في البحيرة.
دار أوبرا دمنهور
البحيرة يعني دار أوبرا دمنهور، ودار أوبرا دمنهور يعني البحيرة، أه والله زي ما بقولك كده، يعني مينفعش أنك متعديش عليها لأنها من معالم البحيرة الفنية وهي في حلاوة دار الأوبرا اللي موجودة في القاهرة بالظبط، ويمكن وأحلى كمان.
هتلاقي فيها حفلات موسيقية، وغنائية، وأوبرا وحاجات تانية كتير وبالتالي هتكون اختيار متميز ليك أنك تعيش معاها أحلى اللحظات الفنية وتفصل عن الواقع. تقدر تدخل على صفحة الأوبرا من هنا بحيث تشوف أيه العروض اللي هتقدمها في الفترة اللي هتقضي فيها أجازتك في البحيرة. وطبعًا لو سألت على عنوان ألف مين هيدلك.
قصور الثقافة
البحيرة زي أي محافظة فيها مجموعة كبيرة من قصور الثقافة بس في قصور بتبقى محدودة النشاط الفني اللي بيتم جواها سواء كان عرض أو ورشة تعليمية، وفيه قصور تانية بتبقى متعددة الأنشطة. ودي القصور اللي أنت هتحتاج تروحها وبنرشح ليك منها قصر ثقافة المحمودية اللي هتلاقيه مليان بالفنون المختلفة من مسرح لندوات شعرية، وكمان صالون ثقافي ونادي سينما.
ومش بس كده، ده فيه كمان حفلات إنشاد ديني، ومسرح عرائس وكورال أطفال. والقصر موجود في المحمودية، المنشية الجديدة، بجوار مدرسة عمر طوسون الثانوية. والقصر ليه صفحة رسمية على موقع التواصل الاجتماعي فيسبوك تقدر تدخلها من هنا.
بعد قصر ثقافة المحمودية عندك اختيار تاني أنك تعدي على قصر ثقافة كفر الدوار وتشوف الانشطة والعروض اللي بيقدمها وهتلاقيه موجود في شارع أحمد عرابي، بكفر الدوار.
السينما
البحيرة كان فيها سينمات كتيرة بس اتهدت واتبني مكانها عقارات بس مش معنى كده أن مفيش سينما، لأ فيه واسمها «سينما بانوراما» موجودة جوا حديقة الجمهورية بدمنهور. وفي المجمل كده أنت عندك مجموعة من الأماكن تقدر تعدي عليها وتشوف بيقدموا ايه أهو منها تاخد خلفية عن الأماكن ومنها أنك تتبسط برؤية عرض أو فيلم أو تشارك في نشاط فني بتحبه.
