للطلاب.. دليلك للحصول على شقة مناسبة تسكن فيها مع صحابك

قبل بداية العام الدراسي يبحث الكثير من الطلاب المغتربين بالجامعات المصرية عن سكن مناسب، وفي سبيل ذلك يشتكي الطلاب من غلو أسعار السكن الخارجي واستغلال السماسرة.

ولكن تتجنب المشاكل، ضع في اعتبارك عدة أولويات ونصائح يحكيها لك طلاب مغتربين سكنوا من قبل.

ابعد عن السمسار

ينصح الطالب حمزة رمضان، بالابتعاد عن التعامل مع السمسار والبحث عن صاحب الشقة والتأجير منه مما يوفر عليك مبلغ التأمين، إلا أن أحمد عصام يرى أن خيار التعامل مع صاحب الشقة مباشرة أمر صعب ويتطلب منك البحث كثيرا، ولا تتسرع في اللجوء إلى سمسار.

ويوضح محمد عبدالغني أساليب السمسار عند عرض الشقة «هيحسسك إن الشقة اللي انت بتشوفها دي ملهاش مثيل ولو مخدتهاش دلوقتي مش هتعرف تاخدها تاني واشتغالات كتيرة».

ويحكي رمضان: «في سمسار طلب مننا 200 جنيه عشان نتفرج على الشقة بس»، ويضيف: «حاول تبعد عن الشقة اللي فوق أو تحت صاحب العمارة عشان هيدايقك في الراحة والجاية لو لقي العدد كبير في الشقة أو زمايلك جايين يقعدوا معاك شوية».

النضافة أهم حاجة

يفضل الطالب محمود فتحي السكن النظيف البعيد عن الجامعة على السكن القريب من الجامعة إلا أنه ليس بالقدر الكافي من النظافة «النضافة أهم من السكن بعيد عن الجامعة أو قريب».

ويوافقه عصام في هذا الأمر حيث يقول إن المكان ونظافته هما الأهم بالنسبة له «انا بروح من الشغل على النوم فلازم يكون المكان نضيف عشان ارتاح من تعب الشغل مش معقول هاجي انام في مكان مش نضيف أو مش مرتاح فيه».

وترى جهاد خلف الطالبة في جامعة الأزهر بالقاهرة أن الأولويات تختلف من شخص لآخر كما أنها تفضل السكن في مكان نظيف حتى لو كانت تكلفته أعلى وبعيد عن الجامعة: «كل ما تبعد السكن بيكون أحلى وأرخص».

كما ينصح عبدالغني بضرورة التأكد من نظافة الأسرّة والغرف والحمام والمطبخ والتأكد من سلامة الأرضية وخلوها من أماكن الحشرات.

شقة قريبة ولا بعيدة

تزيد أسعار الشقق السكنية كلما اقتربت من مقر الجامعة، ويضطر بعض الطلاب للحصول على سكن بعيد في مقابل خدمات ومرافق أفضل، إلى جانب انخفاض أسعار السكن كلما ابتعد الطالب أكثر عن محيط جامعته.

ويزيد سعر السكن المجاور للجامعة نظرا لإقبال الكثير من الطلاب عليه، مما يساعد أصحاب الشقق و«السماسرة» على رفع الأسعار.

التأمين مبيرجعش

يوضح حمزة أنه من المستحيل الحصول على التأمين كاملا حينما تقرر مغادرة السكن، وعلى الأرجح لن تحصل عليه أصلا، ويوضح: «صاحب الشقة هيطلعلك أي حاجة ويغلي سعرها عشان يخصم منك التأمين» ويضيف: «السنة اللي فاتت صاحبة الشقة كانت كويسة معانا طول الفترة اللي كنا قاعدين فيها ولما قررنا نمشي ظبطنا الشقة مفيهاش غلطة، وبرضو خصمت من التأمين عشان كان فيه 4 كراسي مكسورين الواحد ميجيش بـ30 جنيه حسبته بأكتر من 100 جنيه».

وينصح حمزة: «لو ساكن في شقة مش مفروشة هيبقى سهل إنك تتكلم مع صاحب الشقة وتسكن آخر شهر بفلوس التأمين، أما لو مفروشة هيبقى صعب بس ممكن تحاول مع صاحب الشقة لو انت كويس معاه».

صحابك في السكن

يفضل كثير من الطلاب التي تواصلنا معهم السكن مع زملاء يعرفونهم مسبقا، وإذا اضطررت للسكن مع أشخاص تعرفهم لأول مرة، فينصحك محمد حمدي: «مبدأيا تسكن مع اللي مبيشربوش سجاير أو يشغلوا أغانى بصوت عالي في الشقة ويفضل تكون عارفهم أو حتى سكنت معاهم ومش كل اللي تعرفهم ينفع تسكن معاهم انت هتقعد معاهم أكتر من أهلك، ولو انت في أولى يفضل تسكن مع حد تعرفة معرفة شخصية يكون في تالتة أو رابعة».