5 تطبيقات ضرورية للمسافرين حول العالم
عندنا مثل بيقول "الغريب دايماً أعمى، حتى لو كان بصير"، وعشان "شبابيك" ميحبش حد من زواره يبقى أعمى وهو بصير، هيقدملك أفضل 5 تطبيقات لأجهزة الأندرويد يساعدوك انت ومسافر، من تحديد التكلفة وحجز التذاكر ومعرفة أماكن المطاعم والفنادق أسعارها، ولا تسأل ولا تحتاج للمثل اللي بيقول "اللى يسأل ميتوهش".
Maps.Me
ده برنامج خرائط زي "جوجل إيرث" وغيرها من البرامج اللي بتقدم خدمة معرفة المكان، لكن لو روحت مكان وفجأة اكتشفت إن باقة الإنترنت موبايل خلصت، وقتها مش هينفعك غير تطبيق " Maps.Me" لأنه مش بيحتاج نت عشان يشتغل وتقدر تراجع خرايط تفصيلية للعالم كله من غير ما تحتاج لشبكة إنترنت.
XE Currency
أكيد هتتفق معايا إنه أهم تطبيق في الموضوع ده كله، لأنه بيحسبلك أسعار العملات والفرق بينها واسعار صرفها في المكان اللى انت فيه، يعني من الأخر مش هيتعمل عليك الشوية اللي بيتعملوا على أي سايح ونصب في العملة وكده.
Tripit
بعد تنزيل التطبيق على تليفونك، بتسجل عليه الأماكن أو الدول اللى عايز تزورها أو تسافر ليها، بعدها بيقوم هو بدوره تلقائياً وبيعمل بحث عن تذاكر الطيران ومواعيد الحجوزات وتكلفة الإقامة في الأماكن دي ويبعتهالك على إيميلك أو يحفظها في ذاكرة التطبيق، وممكن كمان يختارلك أحسن مكان ممكن تقعد فيه في وسيلة السفر بتاعتك، ده غير إنه هيقدملك أرقام الرحلات بدقة وهيبلغك تلقائياً لو فيه أي تأخير أو إلغاء للرحلات دي.
GasBuddy
ده بقى للناس هواة الحرية في سفرياتهم وبيعتمدوا على نفسهم ولا فوج سياحي ولا مرشد ولا شغل رحلات المدرسة، خصوصاً لعشاق السفر لأوربا، لأنه هيقدملك عنوانين وأماكن أقرب محطات الوقود وأسعاره بالعملة المحلية والفريق بين سعره من محطة للتانية.
Tripadvisor
هو شبه الكتير من البرامج والتطبيقات اللي بتعتمد على تطبيق تحديد المكان Gps بس هو زود عليها خاصية جديدة اسمها "بالقرب مني الأن"، من الأخر مش هيستناك تدور على مطعم أو فندق أو مزار سياحي، هو اللي هيشوف انت فين وهيبعتلك اقتراحات بالأماكن القريبة اللي ممكن تزورها. وممكن كمان تستخدمه عشان تعرف كل حاجة عن المكان اللي هتزوره بعد كده.
