لطالبات إعدادي وثانوي.. وانتي رايحه المدرسة خلي بالك!
كبرتي وحسيتي نفسك آنسة كبيرة، تمام حلو كلنا كبنات مرينا بالإحساس ده، عايزة تنزلي تروحي المدرسة وإنتي بقمة شياكتك؟ مع صحباتك أو لوحدك.. ارجوكي بلاش «الأفورة» ويلا نخلي بالنا من الحاجات اللي ممكن تخليكي عرضة للانتقاد خاصة لو كنتي في «إعدادي أو ثانوي».
- قميص المدرسة
ماما اشتريت القميص مقاسlarge مش لازم يعني تضيقه لحد ما يبقي x small وتقصيريه لأول وسطك، وكمان فكرة إنك تشمري الكمام لحد كوعك. شكلها مش بتكون حلو خصوصا لو إنتي محجبة وحتي لو مش محجبة إنتي رايحة مدرسة يعني على الأقل ممكن تتني أساور القميص لو خنقاكي.
- الجيبة
جيبة المدرسة مش هقول لازم تكون واسعة قد البحر ولا تكون ماسكة عليكي كإنك عروسة البحر،الوسط معقول. يعني مينفعش تعملي فاتحة الجيبة لحد نص رجلك.
- الطرحة
حجابك حريتك الشخصية تلبسيه أو تقلعيه ده قرارك، بس طالما لبستيه وإنتي رايحة المدرسة على الأقل تلتزمي أن طرحتك تكون مناسبة للزي المدرسي بمعني إنها تكون واحدة بس لفاها بطريقة تليق إنك في مدرسة. مش نص شعرك باين والأوصة طالعة ولابسة خمس طرح فوق بعض، وتوكة الريشة الكبيرة إللي بتكبر الطرحة بشكل مبالغ فيه.
- اكسسوارات
تفتكري وإنتي رايحة المدرسة محتاجة تلبسي اكسسوارات سلسة وحظاظات وتيجي ميس انشراح تقولك "إيه ده يا بنت الحاجات ديه مش للمدرسة" وتاخدها منك وتروح تديها لبنتها الصغيرة،و إنتي خارجة للدرس أو مع أهلك ألبسيهم أحسنلك.
- في الشنطة
لو إنتي من البنات إللي بتنزل من بيتها حاطة هدوم خروج في شنطتها، موقفك هيكون إيه لو مشرفة المدرسة قفشتك وهيا بتفتش الشنطة، و بلاش تكوني ناصحة وتلبسي لبس الخروج تحت زي المدرسة وتخرجي بيه، الناس كلها بتبقي عارفة إنك طالبة.. افتكري بس لو حد من أهلك أو جيرانك شافك باللبس ده بعيد عن المدرسة هيفكر فيكي إزاي؟
