دكتور فتحي الشرقاوي يكتب: «هي بيعة»

هى بيعة....
ما صدقتم تخلصوا منها ولا ايه..
لما تيجي بنتكم تشتكي ليكم...
من سوء معامله جوزها السيئة ليها..
وأنها بتعاني وبتتألم من الوضع ده..
يبقى لازم وغصب عنكم كمان..تسمعهوها
ماهو مش معقول اول كلمه تتقال لها..
قومي روحي..
بيتك وعيالك وجوزك أولى بيك...
وكأن كل الوجع والمرار اللي جواها..
مالوش اي قيمه ولا تمن عندكم...
هى جايه لكم تشتكي منه..
تقولولها روحي ليه...من غير ماتعرفوا..
ايه ده... ايه القرف ده..
طيب السؤال هنا..
لو أهلها ماسمعهواش...
ووقفوا معاها فى لحظه معانتها ووجعها.
تفتكروا مين ممكن يقوم بالدور ده..
خاصة أن جوزها هو سبب ألمها...
واللي المفروض يكون سندها...
تروح فين فى اللحظه دي...
وتشتكي لمين فى الوقت ده 
عرفتوا ليه..بعض الأزواج 
بيستبدوا بالزوجه..وبيستسهلوا اهانتها..
وبعزقة كرامتها
لأنهم عارفين ومتأكدين...
أن مالهاش حد ولا ضهر يسأل عليها....
و عرفتوا كمان ليه بعض الزوجات..
بتلاقي نفسها التعبانه مع أول حد...
بيلعب على مشاعرهاو بيطبطب علي جروحها وبيواسيها..
ثم تحدث الواقعه....وماخفي كان أعظم 
أصحوا وفوقوووووا 
استقيموا يرحمنا ويرحمكم الله 
مجرد خاطره