نرشح لك 11حمام سباحة في القاهرة للاستمتاع بـ«الويك إند»
محمود فوزي
صحيح كتير من سكان القاهرة، استمتعوا بسهرات وحفلات الساحل، لكن فيه ناس تانية بعدوا عن الساحل في «الويك إند» بسبب ظروف شغلهم أو لسبب تاني.
لو أنت مش حابب تروح الساحل أو الغردقة وفي نفس الوقت عايز تسمتع بالويك إند، جمعنا لك عدد من حمامات السباحة الموجودة في القاهرة علشان تجدد نشاطك وتستعيد تركيزك مرة تانية. \
Dusit Thani
صحيح ده أغلى سعر لتقضية يوم على حمام السباحة في قائمتنا، بس فيه ناس بتشوف أن قعدة على حمام سباحة مع منظر تحفة يطل على نخل وخضرة يستحق كل قرش.
دوسيت ثاني بيقدم اختيارين لتقضية يوم على حمام السباحة؛ ادفع 1400 جنيه مقابل غرفة دور أرضي بإطلالة رائعة على حمام السباحة والبحيرة، أو 999 جنيه وتقضي يومك في غرفة دور أول.
Fairmont Heliopolis
على بعد دقايق من مطار القاهرة الدولي هتلاقي الفندق الفخم فيرمونت هليوبوليس اللي ممكن تقضي فيه يوم في غرفة ثنائية بـ 750 جنيه، وهناك تقدر تعوم في حمام السباحة المريح وكمان تستمتع بعدد من الخدمات زي الساونا والجيم، ممكن تضيف 200 جنيه كمان وتزود فرد ثالث.
Fairmont Nile City
مع وجود سكاي بوول على روف الفندق بيطل على القاهرة كلها، أكيد تقضية يوم في فيرمونت نايل سيتي هتكون تجربة مختلفة، استمتع بيوم على حمام سباحة فيرمونت نايل سيتي بسعر 400 جنيه وتقدر كمان تستخدم الساونا وغرفة البخار.
Sofitel Cairo El Gezirah
صحيح حمام سباحة سوفيتيل الجزيرة صغير شوية، بس المنظر البانورامي الأسطوري للنيل أكيد هو الاختيار الأمثل للناس اللي بتحب تتفرج على غروب الشمس الساحر فوق ضفاف النيل.
سوفيتيل دخل ضمن قائمة حمامات السباحة الغالية اللي معانا النهارده، وبيعرض تقضية يوم في غرفة ثنائية مقابل 1570 جنيه، أو 2060 جنيه للغرفة الثلاثية، وممكن تدفع 600 جنيه بس لو عاوز تعوم شوية من غير ما تنزل في غرفة.
Conrad
استمتع بحمام سباحة كونراد وإطلالته الرائعة على النيل مع مشهد وسط البلد التاريخي بسعر 624 جنيه للغرفة الثنائية، أو 708 جنيه للثلاثية أو 300 جنيه من غير غرفة خالص، ومتاح لك تستخدم الساونا والجيم وغرف تغيير الملابس.
Mena House
حمام سباحة دائري جميل مساحته كبيرة وفيه غرف كثيرة لمحبي السباحة، وطبعًا مش هينفع ننسى المنظر المهيب لأهرامات الجيزة، وميزة تقضية يوم في مينا هاوس هي الإطلالة الرائعة وكمان أسعاره الممتازة؛ لو هـ تقضي يوم من غير غرفة هـ تدفع 350 جنيه للفرد أو 700 جنيه في الغرفة الثنائية، أي اختيار من اللي فاتوا يشمل وجبة.
Sakkara Country Club
لو بـ تدور على يوم لطيف على حمام السباحة وسعر مناسب، يبقى أكيد سقارة كانتري كلوب هو الحل، صحيح الغرف هناك للأعضاء، بس تقدر تقضي يوم على حمام السباحة الكبير هناك بـ 200 جنيه للفرد شاملة وجبة.
Royal Club Mohamed Ali
من أشهر النوادي الموجودة على النيل ومن أكثر الأماكن اللي بـ يتعمل فيها حفلات أفراح وخطوبة، ومحمد على رويال كلوب مشهور كمان بحمام سباحة واسع بـ يطل على مبنى بالمعمار الإسلامي المميز، استمتع بيوم على حمام السباحة من 10 صباحًا لغاية 6 مساءً في محمد على رويال كلوب بسعر 150 جنيه للفرد شاملة مشروبات غير كحولية.
Holiday Inn
زمان كان معروف بسوفيتيل القاهرة أبراج المعادي، وبعدها تغير لفندق هوليداي إن في نوفمبر 2014، ولحد النهارده محافظ على موقعه الرائع على كورنيش المعادي وبـ يتميز بحمام سباحة مبهر ومنظر حكاية لأهرامات الجيزة من على بُعد.
هوليداي إن بـ يقدم قائمة أسعار معقولة لتقضية يوم هناك، تشمل 150 جنيه لدخول حمام السباحة بس أو 700 جنيه لقضاء يوم في غرفة ثنائية.
JW Marriott
مشهور بحمام سباحة ممتع فيه أمواج صناعية رائعة، وكمان مشهور بأسعاره الغالية، وتقدر تستمتع بيوم على حمام السباحة في جي دبليو ماريوت بـ 1270 جنيه في أيام وسط الأسبوع، مع دخول الجيم وغرف تغيير الملابس وغرفة البخار، أما في الويك إند لازم تكون حاجز غرفة للمبيت، ودي أسعارها تبدأ من 1070 جنيه للغرفة الثنائية.
Villa Belle Époque
مكان هائل للناس اللي بـ تدور على أجازة رومانسية في القاهرة بعيدًا عن الزحمة والدوشة، وفيلا بيل إيبوك بطرازها الأوربي المميز بـ تقدم لك ويك إند هادئ ومريح، استمتع بقضاء يوم في فيلا بيل إيبوك بـ 500 جنيه للغرفة الثنائية أو 650 للثلاثية. 
