لو عايز تبهر حبيبتك؟.. إليك الأفكار المجنونة
لكل حبيب عايز يعمل مفاجأة لحبيبته في عيد الحب، لو عمال تفكر وتسأل الناس عشان تعمل حاجة حلوة ومختلفة وبرده موصلتش لحاجة، متقلقش يا سيدي هنقولك حبة أفكار تخليها يغمى عليها من كتر الفرحة :) أعمل نفسك ميت
خلي حد من أصحابك يكلمها ويقولها إنك عملت حادثة كبيرة واتنقلت للمستشفى ونفسك تشوفها.. وأول ما توصل المستشفى خلي حد منهم ينتظرها قدامها.. وأول ما توصل يقولها إنك اتنقلت لمستشفى تانية عشان مفيش أوضة فاضية.. وخليه ياخدها ويروحوا على المكان اللي هتكون مستنيها فيه ماسك تورتة في أيديك عليها صور لحظات ليكوا وأصحابكوا حواليكوا بيغنولكوا أغنية.
ولو أنت كنت ناوي تتقدم ليها قريب يبقى في نفس اليوم ده الصبح تكون اتصلت بوالدها وتقوله إنك عايز تقابله برا البيت وتنبه عليه ميقولش حاجة للبيت عنده ولا لبنته طبعا.. ولما توصل ليك تلاقي أبوها معاك وتطلع دبلة الخطوبة وتطلب إيديها منه.
تليفون السعادة
دور على أرقام تليفونات مغنين أو ممثلين أو ممثلات أو أي حد تاني معروف هى بتحبه.. وكلمهم وقولهم كلام عايز تقولوا ليها بس على لسانهم وطبعا قولهم إنك حابب تعمل ليها مفاجأة وتخليهم يكلموها عشان عايز تفرحها.
المايك معاك
روحوا أي حفلة مع بعض ولما تقعودوا قوم وأعمل نفسك رايح الحمام.. وروح لمنظمين الحفلة واتكلم معاهم أنك عايز تطلع تهدي ليها أغنية وتغنيها مع المغنيين على المسرح.
بالونة في الهوا
اشتري بلالين كتيرة جدا تكون هيليوم وعدي عليها بليل تحت البيت على الساعة 2 أو 3 تكون الناس نامت.. وكلمها في التليفون وقولها اطلعي في الشباك كده وأول ما تطلع طير البلالين كلها في الهوا وقولها بحبك.
برد الشتا
في عز برد الشتا خدها وأطلعوا على القلعة أو البرج أو أي مكان عالي.. واتفق مع أي حد تعرفه بيعزف على الكمان خليه يكون هناك وفي نص ما انتو قاعدين رنله من غير ما تاخد بالها وخليه يكون جاهز أنه يعزف وأول ما يجلكوا أقف غنلها على ألحان كمنجته.
