تعرف على إجراءات السفر للصين وأماكن الإقامة والفسح
ياسمين الصاوي
"الصين بلد جميل" أكيد ناس كتير نفسها تسافر هناك تتفسح وتشوف حاجة جديدة أو تتجوز بنت صينية كمان، لكن ما بيبقوش عارفين يروحو فين وييجو منين وايه الورق المطلوب منهم ولما يسافروا يزوروا ايه وينزلوا فين... اعرف دلوقت الورق اللي محتاجه و إجراءات السفر من أول ما تخرج من المحروسة لحد ما توصل الصين، وكمان تقدر تروح فين هناك.
جواز السفر وتأشيرة الدخول
في الأول كده لازم يكون عندك جواز سفر، "باسبور" يعني، ولو مش عندك يبقى اطلع بسرعة على مكتب الجوازات التابع لمنطقتك، ومعاك البطاقة بتاعتك وصورة البطاقة، والمؤهل الدراسي وصورة المؤهل برضه، و3 صور بخلفية بيضاء مقاس 4X 6 طبعا بتوع استوديو التصوير عارفينها كويس، وحضر حوالي 170جنيه معاك وأعمل حسابك برده عشان لو زودو الرسوم، واملى الاستمارة، وشوف هتستلمه امتى.
طلعت جواز السفر خلاص؟ مبروك عليك، اطلع بقى على السفارة الصينية في الزمالك، ومعاك جواز السفر وصور شخصية طبعا، واملئ استمارة طلب فيزا من هناك، ويكون معاك حجز طيارة مؤكد وحجز فندق كمان، وكشف بنكي يضمن أن معاك فلوس تقدر تستخدمها وقت الزنقة هناك.
العملة
قبل ما توصل الصين أعمل حسابك تكون مغير فلوس من هنا، روح أي صرافة قريبة منك وغير من الجنيه إلى يوان، الجنيه يساوي 0,812 يوان
اللغة
عشان تسافر الصين مش كفاية تكون عارف انجليزي لأن معظم الناس هناك ما تعرفش انجليزي خالص، اتعلم كلمتين صيني قبل ما تسافر، تقول ايه لما تيجي تشتري حاجة أو تسأل على حاجة، وده موقع كويس فيه دروس تعليم اللغة الصينية من أول التحية لحد تقول ايه في المحلات والشراء وغيره http://goo.gl/s3sciq
الفنادق والأماكن السياحية
حسب المقاطعة اللي انت رايحها، هتحجز الفندق اللي هتنزل عليه، ده موقع http://goo.gl/0kyEqH بالعربي لحجز الفنادق في كذا مقاطعة، يعني بتختار المقاطعة اللي انت رايحها سواء شنغهاي أو بكين أو هانغتشو أو شيان أو تشينغداو أوغيرهم، وموعد الوصول وموعد المغادرة وعدد الأفراد، وتعرف سعر الغرف، كمان بتتفرج على شكل الغرف من جوه وشكل الفندق وقريب من ايه وبعيد عن ايه.
أما بالنسبة للأماكن السياحية هناك، ما يفوتكش تزور سور الصين العظيم اللي كلنا عارفينه، والمدينة المحرمة في بكين والقصر الامبراطوري اللي عليها صورة زعيم الثورة الصينية ماوتسي دونغ، وشوف الباندا اللي مش هتشوفها في أي مكان في العالم إلا في مدينة تشونغ تشينغ، ومحلات الملابس والتسوق في شنغهاي اللي بتنافس محلات شارع الشانزليزيه في باريس في جمالها وأسعارها الغالية جدا.
وممكن تاخذ قارب صغير تتجول به في نهر اليانغستي (أطول أنهار العالم) اللي بتطل عليه مدينة سوتشو بمبانيها الكلاسيكة القديمة الرائعة وتستمتع شوية بالهدوء، ولا الاحتفالات في الشوارع والمهرجانات خصوصا لو مسافر في موسم أعياد يعني في عيد الربيع في الصين مثلا في شهر فبراير وغيره.
كمان في مساجد وكنائس هناك كتير ما تقلقش، وبعد الصلاة هتلاقي ناس واقفين بعربيات يبيعو أكل وشرب وكل اللي نفسك فيه، ده غير المطاعم الصينية هناك اللي بتقدم أكل صيني على أصوله، وسيبك من فيلم "فول الصين العظيم" والصراصير والكلام ده، في مطاعم بتقدم أكل للمسلمين وحلال.
وطبعا ما تنساش تتصور وتدعيلنا!
