يعني إيه «لاموري في زوري» اللي بيقولها رامز جلال في كل حلقات «رامز تحت الصفر»؟

«لاموري في زوري»، هي كلمة بيقولها رامز جلال في كل حلقة من برنامجه «رامز تحت الصفر» وكتير مننا بيسأل معنى «لاموري في زوري» إيه؟.

التعبير بيردده رامز باعتبار إنه مدرب منتخب مصر هيكتور كوبر أو شقيقته، بلغتهم الإسبانية.

سألنا المترجم الإسباني، إبراهيم الحيطاوي عن معنى الكلمة، لكن قال إن مفيش ولا كلمة من اللي بيقولها رامز في البرنامج صح: «مفيش ولا كلمة قالها رامز صح، كله مش لغة أصلا».

الحيطاوي كمان قالنا على المعنى الأقرب للجملة اللي تقصدها شخصية هيكتور كوبر في كل حلقة وهي أحلام المصريين في رقبته ودي كانت الترجمة الصحيحة ليها باللغة الإسبانية: «Los deseos de los egipcias están en mi responsabilidad».

أما الصحفي والمترجم الإسباني، مصطفى السعيد، اعتبر إن كل الكلام اللي بيقولوا رامز مش موجود في أي لغة وهناك كلمات من الإيطالي بس المعنى بتاعها غير المقصود خالص، زي «لاموري» الشبيهة بكلمة «al amor» بالإيطالي واللي معناها حُب.

السعيد ترجملنا المعنى الأقرب لجملة أحلام المصريين في كأس العالم في رقبتي بالإسباني وهي: «Sueños de los egipcios en la copa del mundo son mi responsabilidad».

ويظهر رامز جلال في كل حلقة من برناجه الرمضاني في شخصية مدرب منتخب مصر أو شقيقته، ويتمتم بكلمات غير مفهومة ويترجمها ضيفه الدائم مجدي عبدالغني باعتبارها تنتمي للغة الإسبانية التي يتحدث بها كوبر.