تلاعب بالجملة في انتخابات طلاب جامعة بني سويف.. رئيس الاتحاد يكشف التفاصيل
كشف رئيس اتحاد طلاب جامعة بني سويف، أحمد السيد، عن وجود تلاعب في إجراءات انتخابات اتحاد طلاب الجامعة للعام الدراسي 2018-2019.
وتحدث رئيس الاتحاد في منشور مطول على صفحته بموقع التواصل الاجتماعي فيس بوك عن منع كثير من الطلاب من الترشح للانتخابات، وشطب عدد كبير من المرشحين، لأسباب متعلقة بعدم إثبات ممارسة النشاط».
تعنت رعاية الشباب
وأوضح: «الطلبة في كليات كانوا بيروحوا لرعايات الشباب عشان يسحبوا منهم الاستمارات وهناك يرفضوا يطلعوا الاستمارات أصلا، مع إن حقك تاخد استمارة وتملاها وقرار اللجنة فيك دا بعد كدا لكن مش من حق حد يمنعك من ملئ الاستمارة».
وأضاف: «كانوا يقولولهم مثلا انت ملكش نشاط فبالتالي مش هتترشح واللي يقولولهم روحوا هاتوا حاجة تثبت إن ليكم نشاط».
وتسائل رئيس اتحاد طلاب جامعة بني سويف: «هيجبلك منين طيب؟ ما انتوا بتوع النشاط نفسه يا جماعة، انتوا رعاية الشباب والنشاط مقتول في كل الجامعة والله بكل الأشكال وانتوا مبتطلعوش أي نوع من أنواع الأوراق أو الشهادات لأي حد حتى لما بياخد مركز مبياخدش أي إثبات على دا، وآخره يروح ياخد الـ٥٠ جنيه المكافأة وخلاص».
التواصل مع الطلاب والجامعة
تواصل عدد كبير من الطلاب مع ممثل الاتحاد؛ لعرض شكواهم ويتواصل مع إدارة الجامعة لحل الأزمة.
«طلبة أعرفهم وأكتر منهم معرفهمش على مدار الأسبوع كله بيرنوا عليا.. التليفون مكانش بينزل من على ودني لمدة أسبوع، متخيلين مئات وآلاف عندهم الرغبة في الترشح والجامعة بتمنعهم؟!» يقول أحمد السيد.
ويضيف: «الطلبة بقت تروح مكتب نائب رئيس الجامعة لشئون التعليم والطلاب ورئيس لجنة الانتخابات وتطلب تقابله فيرفض يقابلهم ويقولهم سيبولنا ورق وهنبقى نشوفه».
وتابع: «أنا بنفسي على مدار أسبوع بكلم نائب رئيس الجامعة ومرة يقولي مش في مصلحتك تتكلم في دا ومرة يقولي يجولي المكتب ويروحوا ميحصلش شيء ولا يوصلوا لحاجة لحد امبارح بيقولي هما متأخرين مجوليش التلات ولا الأربع ليه؟. قولتله حضرتك الكشف اتعلق الأربع بعد الناس كلها ما مشيت من الكليات، يجوا التلات ازاي؟! وحضرتك مكنتش موجود الأربعاء أصلا؟!».
وأشار رئيس الاتحاد إلى أن الطلاب المشطوب أسمائهم هم أقوى شخصيات في كل الكليات ولو ترشحوا لحصلوا على المناصب لأنهم أكثر الطلبة قوة وخدمة ونشاطًا واحترامًا، كما أنهم من أوائل الدفعاتومثلوا الجامعة في مؤتمرات الشباب ومعسكرات خارجية ولا غبار عليهم من كل الجهات.
وطالب رئيس الاتحاد إدارة الجامعة ببيان رسمي توضح فيه تفصيليًا أسباب شطب هذا الكم الهائل من الطلاب في كل الكليات.
