صور.. الأفراح من الكرسي المذهب إلى التوك توك
فاكرين صور الأفراح بتاعة زمان، طب جربت تقارنها بصور افراح دلوقت، أكيد الجيل اختلف والتفكير والحياة كمان، لكن خلينا نتفرج شوية كده ونشوف اختلفت ازاي بقى؟
جدي وجدتك
افتح ألبوم صور فرح "جدي وجدتك" الأبيض وأسود، وأرمي عينك كده واتفرج واستمتع، ياسلام على الشياكة! شايفها قعدة على الكرسي المذهب عند المصوراتي ازاي، وابتسامتها الخفيفة جدا أو غالبا مش هتلاقيها مبتسمة أصلا، وبوكيه الورد طبعا في ايديها كده وهي قعدة، حاجة عظمة! طب بص عليه واقف جنب الكرسي ازاي، برنس في نفسه، بدلته وكرافتته مكويين ومرتبين هياكلو منه حتة، برده مش مبتسم زيها أو ابتسامة خفيفة أوي، وايديه جنبيه أو على ضهر الكرسي.. شوف الناس الراسية الشيك يا جدعان!
أبوك وأمك
نط نطة كده على الجيل اللي بعده على طول، وشد ألبوم صور فرح أبوك وأمك في نفس الاستوديو بعد ما المصوراتي مات وابنه ورث الاستوديو، هي واقفة بقى وماسكة بوكيه الورد برده، بس المرة دي بتضحك وسنانها بتلمع اهيه، وهو واقف وراها أو جنبها، ولازم تلاقيه يا إما ماسك إيديها أو ساند إيده على كتفها أو وسطها، وهما الاتنين أخر كسوف، وخلفية وراهم عجيبة جدا من اختيار المصوارتي طبعا، ودي بالنسبة لهم قمة الرومانسية، وصورة رهيبة تتحط في وش الألبوم كده
صاحبك وصاحبتك
رجع ألبومات الصور دي مكانها، وتعالى اتفرج على صور فرح صاحبك وصاحبتك دلوقتي، الحق البنت مش ماسكة بوكيه ورد، ولا الولد واقف متسمر جنبها، ايه ده؟ دول ما راحوش الاستوديو كمان، متصورين في توك توك متزوق في الشارع، أمال فين الشياكة والسهوكة في الصورة؟ ينفع كده؟ دول بيقولو أن كتير من المصورين كمان بيصورو العروسة والعريس صور أجمد من كده أشي في سوبر ماركت واللي عامل أن عروسته سرقت قلبه وهي ماسكة قلب وبتجري واللي راكب حصان أبيض بجد وخطف عروسته عليه وغيره وغيره.
خلاص يا ولاد العروسة قامت من على الكرسي المذهب وركبت التوك توك، والعريس قام وراها، وانتهت موضة زمان دي خالص، وبقى الشعار دلوقتي "اتجنن الصورة تطلع حلوة."
