نرشح لك 7 أماكن هادئة لقضاء عيد الحب
كل حاجة بقت في بلدنا زحمة ومفيش جديد فيها، وعيد الحب جاي وبتفكر في مكان هادىء أو ممتع على الأقل في النهاية بتلاقي كل أفكارك راحت لأماكن متنفعش لأنها غالية أو زحمة.
شبابيك هيرشحلك بعض الأماكن اللي ممكن تروحها في عيد الحب وبأسعار وتكاليف بسيطة وهادية وأمان من غير ولا ألفاظ أو مناظر خارجة.
كافيه زمان بالمعادي
الكافيه دورين، الأول عبارة عن مكتبة لشراء الكتب أو استعارتها، أما الدور الأرضي عبارة عن قاعة بتشيل أكتر من 100 فرد، وبتقام فيه حفلات وعروض وأعياد ميلاد وورش العود والرسم، وفيها كمان جلسة عربي ومكان للبلايستيشن.
وجو بقى كلاسيكي مالوش حل، صور لنجوم الزمن الجميل، وطرابيش وبيشة، وتليفون من أيام الخمسينيات، وراديو من أيام الأربعينيات، وفي القاعدة العربي، بتتعمل المشروبات على "سبرتاية" من أيام زمان، والشاي في "براد"، وأسعاره معقوله جداً.
تغيير ومكان راقي وهادي من غير مدايقة أو تحرش أو غيره.
العنوان:
256 أمام جراند مول وبنك HSBC, المعادي المعادي, القاهرة, مصر.
التليفون: 01141707376
جزيرة المعادي
جزيرة في وسط النيل بكورنيش المعادي، المكان فيه مطاعم ومساحات خضرا كبيرة جداً وقاعات أفراح وكافيهات راقية بأسعار رمزية وبسيطة، يعني تذكرة الدخول ما تتعداش 10 جنيه، فيها أربع مطاعم كلها علي النيل زي المطعم الريفي ومطعم أفندينا اللي بيقدموا أكل ريفي والأكل الإيطالي والبيتزا والمعجنات من المطعم الإيطالي، جمال المكان إنه ينفع لكل الناس؟
العنوان: كورنيش المعادي أمام المحكمة الدستورية ومستشفى المعادي العسكري.
مترو الأنفاق: محطة حدائق المعادي.
التليفون: 0101 820 2003
الريف العربى
هو منتجع سياحي مبني بالطريقة الريفية القديمة، بس هتلاقي حمام سباحة جنبها، من جوه فيه معم واسطبلات خيل ومساحات خضرة كبيرة جداً.
هترجع شوية للريف المصري الجميل لما تاكل الفطير وتقعد في بيوت مبنية بالطين، وتذكرته مش بتزيد عن 100 جنيه شاملة وجبة فطار وغدا وفقرات احتفالية زي رقص الخيل والمزمار البلدي، ولعب البينج بونج والطايرة .
العنوان / المريوطيه في اتجاه طريق سقاره السياحي بعد معهد المدينة
5 أفكار مجنونة لهدايا الولاد في «الفلانتين»
باب توما BABTOMA
باب توما، موجود في التجمع الخامس، المكان فيه ساحة جلوس خارجية الإقبال عليها بيكون كبير جدا، لأن قاعدتها حلوة ومريحة والمساحة الخارجية كبيرة وفيها خصوصية أكثر، والمطعم فيه أكلات من كل مطابخ العالم، أطباق رئيسية وساندويتشات ومعجنات وطواجن ومقبلات، وفيه حلويات سورية ولبنانية كتير زي الغزل البيروتي والكنافة النابلسي والحلاوة بالجبن وعصائر ماء الورد والجلابوغيرها من المشروبات الشامية، ومن الاخر مش هـتنسى لحظة أنك أساسًا في مطعم سوري، وسعر الطبق مش بيزيد عن 30جنيه.
التجمع قبل نهاية شارع التسعين في مول كونكورد بلازا أمام الميتنج بوينت
الفرع التاني: التجمع برضه خلف أكاديمية الشرطة.
وادي الريان
هي في الأصل محمية طبيعية ما بين القاهرة والفيوم، لكن زودوا عليها الشكل الترفيهي وبدأت فعلا تستقبل الناس، هناك بقى هتشوف مناظر سياحية من شلالات وبحيرات وحاجات تاني رائعة، وهتلاقي مطاعم كتير قريبة وبأسعار معقولة جدا.
وأغرب تجربة ممكن تجربها التزحلق على الرمال، ولو مش غاوي الحاجات دي هتلاقي هدوء بشكل مثالي، وتكلفة ده كله بالوجبات الرئيسية مش هيزيد عن 150 جنيه للفرد، وفيه شركات بتنظم رحلات يومية بنفس السعر تقريبا.
الحديقة اليابانية
موجودة في حلوان على مساحة 12 فدان، وتأسست سنة 1922، ميزة الحديقة اليابانية إنها هتاخدك لبرة مصر وخصوصا اليابان.
بتضم الحديقة عددا من المناطق الخلابة، زي منطقة الكشك العربي وكشك الموسيقى، وبحيرة التماثيل اللي بيطل عليها 49 تمثالا، من ضمنهم مجموعة من تماثيل بوذا .
سعر التذكرة 5 لفرد الواحد ومجانا للأطفال.
العنوان: جوار محطة مترو حلوان
خيمة مندي
ده مطعم وكافيه في كرداسة، أسعاره هادية جدا وخدمته كويسة، وجماله في إنه على شكل خيمة كبيرة.
كان مجرد مكان للشباب قبل كده لكنه اتحول لمزار للعائلات والشباب والبنات، وأكيد هناك هتلاقي اللي بتدور عليه.
أسعاره مش بتزيد عن 10 لأغلى مشروب، والأكل بتبدء الوجبات من 15 جنيه لحد 40 جنيه.
العنوان: طريق كرداسة المنصورية
