ازاي تتعامل مع الطلبة اللي بتشدك للفشل في الجامعة؟
الناس الفشلة :) اللي منتشرة في الجامعة وبتحاول تحلق عليك في كل لحظة تشوفك فيها وانت داخل الحمام وانت رايح تاكل، وانت على باب المدرج وغرضهم انهم يمحوا أي أمل جواك في انك تعدي السنة.
وعشان غرضهم ده ميكملش وياخدوك في سكتهم هنقولك في الموضوع ده على نماذجهم وازاي تتعامل معاهم.
والمصحف ما فتحت
النموذج ده بيبقى فاشل ظاهريا ودحيح باطنياً بمعنى انه عايز يفشل كل اللي حواليه وهو الوحيد اللي ينجح ويجيب تقدير وسطيهم وجملته المعروفة والمصحف ما فتحت لما حد يسأله فتحت المادة ولا لسة. يرد يقوله والمصحف ما فتحتها وفي الأخر تلاقيه جايب امتياز فيها.
النموذج ده بقى لو صادف وقابلته متسألوش أصلاً انت عملت ايه في المادة خلي كلامك معاه كلمة ورد غطاها ولو هو سألك ذاكرت ولا لسة قوله الحمد لله بحاول ألم الدنيا زي كل الدفعة، وبكدة انت بترميله بشكل شيك ان الناس كلها طبيعي أصلاً انها بتذاكر وانه كداب والمثل بيقول ان اللي على راسه بطحة يحسس عليها فأكيد هيفهم ان الكلام عليه.
فكك
ده بقى النموذج اللي لما صاحبه يقوله تعالى نحضر المحاضرة يقوله يا عم فكك تعالى نقابل البت سوسو في الكافيتريا وبيخلي صاحبه يسيب المحاضرة وينزل معاه يقابلوا سوسو ومرة في مرة في مرة هوووب النتيجة تظهر ويشيلوا السنة هما الإتنين وسوسو تنجح :D .
ده بقى الحل لما تشوفه انك تقوله انت بإبتسامة لطيفة "لا يا عم فكك انت أنا هحضر المحاضرة عشان هيعلقوني في البيت لو سقط السنة ديه" وبكدة انت معاملتوش بطريقة رخمة وهزرت معاه وفي نفس الوقت حققت اللي انت عايزه في انك تحضر محاضرتك.
أمينة رزق
ده بقى اللي بيصدر للواحد اكتئاب وحزن وقرف وبيكرهه في العيشة واللي عايشنها وفي الجامعة وفي المستقبل وكلامه للواحد عبارة عن هتعمل ايه يا ابني بالشهادة، فاكر نفسك هتشتغل يعني، طب هما اللي اشتغلوا خدوا ايه، البلد ديه بلد الوسايط والطلبة مننا مكانهم صندوق الزبالة. وده بقى حله انك تنفد بجلدك عنه لأن وجودك معاه هيخليك تنتحر من كتر الإكتئاب اللي هتسمعوا منه.
مزاجانجي
ده بقى اللي بيجرب كل أنواع المخدرات و ضارب الدنيا صارمة وعايش في البلا لاند، الشخص اللي زي ده بيحب يشد الناس الشاطرة معاه ويخليهم يجربوا المخدرات وياه عشان يضيعهم زي ما هو ضايع وفي الوقت ده بيحس بلحظة انتصار لما يلاقي ان مفيش حد أحسن من حد وان كلنا بنشم سوا، ده بقى لو قابلك حاول تكسب فيه ثواب وتنصحه انه يبعد عن الطريق اللي هو فيه ولو مسمعش منك سيبه وامشي.
عبدو مجانص
ده بقى اللي لو في خناقة في الجامعة بيبعتوا يجيبوه عشان يضرب الناس وبيكون معاه شلة كدة تساعدوا في الضرب ولو واحد من الشلة ديه خلع يبقى خاين ويتعمل فيه الجلاشة، ده بقى لو كلمك هيبقى عايزك في مصلحة تعورلوا حد تسرقله حد وطبعا وجودك معاه هيبقى شبهة لأنك بنسبة كبيرة ممكن تقضي سنوات جامعتك في السجن معاه.
