شايف إنك رسام؟.. 5 طرق لتسويق نفسك
فيه شباب وبنات في الجامعة موهوبين جدا في الرسم ولا "بيكاسو" في زمانه، لو استغلوا موهبتهم صح منتجاتهم هتسمع وسط الناس وهيبقوا معروفين، في الوقت ده بقى هيقدروا يكسبوا ويكون عندهم عائد مادي، يقدروا يصرفوا منه على نفسهم أثناء الدراسة.
وعشان كده في الموضوع ده هنقترح على كل رسام بيقرا الموضوعطرق يستغل بيها موهبته.
عيد ميلاد
لو معزوم على عيد ميلاد واحد صاحبك اعمله رسمة كهدية ليه، عشان ده هيبقى تسويق ليك لأن لما أصحابه يشوفوا الرسمة هيكونوا عايزين واحدة زيها، وبكده شغلك هيتعرف و هينتشر ما بين الناس.
النت
اعمل صفحة ليك على الإنترنت ومواقع السوشيال ميديا وانشر عليها رسوماتك كلها، واكتب على كل رسمة سعرها واستخدمت أدوات ايه فيها، وشوف حد مسئول عن التسويق يسوقلك الصفحة عشان تتعرف ويبتدي يجيلك ناس عايزة تشتري لوحاتك.
الجامعة
حاول تتكلم مع إدارة الجامعة إنك عايز يكون ليك مكان في الجامعة، تعمل بورتريه للناس كل اللي هتحتاجه كرسي واستاند عليه لوحة، وألوان وحاول توفق ما بين رسمك في الجامعة ومحاضراتك، يعني ممكن تخصص ساعة كل يوم ترسم فيها الناس، وطبعا حدد سعر للبورتريه.
معرض
حاول تعمل ليك معرض و اسأل في ساقية الصاوي تكلفة المعرض بتكون كام أو أي مكان تاني تعرفه بيتيح الفرصة دي، لأن ده هيخلي ناس كتير مهتمة بالرسم تجيلك وتشوف المعرض وهتكتسب منهم خبرات وهيكون بينكو تعاون في المستقبل.
جاليري
جهز شوية رسومات ليك ولف على الجاليريهات اللي بتبيع رسومات في منطقة الزمالك والمعادي تحديدا، عشان الناس هناك بتكون مهتمة بالرسم، وخلي مسئول الجاليري يشوف رسوماتك وقوله حضرتك تحب أرسملك النوعية دي من الرسومات، لو قالك أه قوله أعمل لحضرتك كام لوحة، أما لو قالك لأ لف على جاليريهات تانية وبردو ده ميمنعش انك تشوف جاليريهات برا الزمالك والمعادي.
