نصائح تساعد على زيادة راتبك
كل شخص بيفكر دايما في زيادة المرتب، وبيقلق ويكون متردد أحيانا، وفيه اللي بيقرر يستنى الزيادة المعتادة من مؤسسته أو شركته. «شبابيك» هيقدملك شوية نصائح وخطوات تعملها وأخرى لازم تبعد عنها، اقراها وتقل قلبك وعلى مديرك على طوووووول.
- أول حاجة لازم تدرس السوق وتشوف شغلك وأهميته وبيقدم إيه للسوق اللى أنت بتشتغل فيه.. وهل مجالك بيتقدم وبياخد مكانة وأصبح شيء لابد منه.. كل دي أمور مهمة.. ومتنساش معاها مستوى مؤسستك وحجمها بالنسبة لمنافسيها في السوق.
- قبل ما تطلب زيادة.. لازم تسأل نفسك هل أديت واجبك وعملت اللي عليك؟.. طيب أضفت حاجة جديدة تستاهل عليها الزيادة؟..أعرف ده من تقييماتك الشهرية وأراء رؤسائك في شغلك.
- الزيادة في المرتب بتدفع مقابل عملك بالفعل.. عشان كده ركز في تخصصك ومتحاولش إنك تفرض نفسك في أعمال تانية وتشتت أفكارك وتزود ساعات العمل عشان تثبت إنك شغال وبالتالي تطلب زيادة.. الموضوع ده مجرد إرهاق وعبء عليك بدون طائل.
- شوف الوقت المناسب لطلب الزيادة.. والمناسب هنا مش ليك لوحدك.. لأ ليك ولمؤسستك ومكانك اللي بتشتغل فيه.. مينفعش تطلب زيادة وهي بتمر بأزمة مالية.. أو فيه مشاكل في السوق بتنذر بأزمة بعد كده.. لازم كمان تحط في اعتبارك آخر زيادة أخدتها.. والنفقات الاستثنائية اللي ممكن تكون أخدتها من الشركة أو المؤسسة قريب.
- متحاولش تستخدم أسلوب التهديد مع مديرك وأنت بتتفاوض.. ومترهنش وجودك في الشغل بزيادة المرتب.. لأن الزيادة في الوقت ده بتبقى تحت النقاش والتهديد ممكن يوصل إنه لا في زيادة ولا شغل أصلا.
- بص على الناس حواليك، ومستواك بالنسبة ليهم وهما بيقدموا إيه أكتر أو أقل منك.. قارن مرتبك بمرتباتهم وأعرف قدراتك وأخلق تقييم بينك وبينهم مع نفسك.. أحيانا المقارنة بتبقى مش في صفك وقت الكلام في المرتب والحاجات دي.. لأنت متعرفش المرتبات بيتم توزيعها على أي أساس وممكن تتفاجأ إنك متستحقش مرتبك..عشان كده لازم تحط كل حاجة في الاعتبار.
