رغدة جلال الدين تكتب: مشهد من الحمام
من فترة كبيرة خرجت أنا وأصحابي نتفسح لأننا كنا بقالنا كتير مشوفناش بعض، فدخلنا سينما وبعد كدة اتمشينا شوية شوفنا التخفيضات اللي معمولة في المحلات ودخلنا نقيس شوية حاجات ومشتريناش حاجة في الأخر:D
بس ريحة الأكل اللي حوالينا في المكان شوقتنا نروح ناكل حاجة فكل واحدة مننا راحت تشوف هتاكل إيه وبما إني عامله دايت :D فروحت جبت أكل مشوي و بعد ما كل واحدة جابت الأكل اللي عايزاه جت مرحلة إننا ندور على تربيزة وكراسي ناكل فيها .
وبعد الفحص والمحص والتمحيص لقينا مكان قعدنا أكلنا، اليوم لغاية كدة ماشي طبيعي لغاية ما روحت الحمام أحط أحمر وأخضر :D واستوقفني مشهد لسة فاكراه لغاية دلوقت وحبة أحكيلكوا عليه .
المشهد هو إني لقيت مسئولة النظافة في الحمام بتستقبل كل واحدة داخلة بإبتسامة بشوشة مبهجة وبتنضف كل حمام بتخليه على سنجة عشرة وده قبل ما كل واحدة تدخله والأعظم كمان إنها بتقول لكل ست تدخل اتفضلي يا هانم J، خلت كل الناس فرحانة من تعاملها وإحترامها ليهم وبقوا خارجين من الحمام إبتسامتهم على وشهم .
مشهد زي ده مكنش ينفع يعدي من غير ما أكلمكوا عليه لأني شوفت فيه حاجات حلوة كتير شوفت إن الناس محتاجة تهتم بالشغل اللي بتعمله حتى لو بيشتغلوا شغلانة الناس بتبصلهم فيها نظرة طبقية، فمادام الشغل شريف يبقى طظ في كلام الناس وكمان شوفت إن لازم الناس تبص على شغلها اللي شايفة إنه مش قد المقام على إنه شغل زي أي شغل مهم في العالم.
فوجودك كعامل نظافة مهم في حياة الناس كلها لأنك لو مش موجود إحنا هنموت من الوباء، ووجودك كعاملة في المنزل مهم لأنك بتساعدي صاحبة البيت في حياتها، ووجودك كحارس للعمارة مهم لأنك بتحمي حياتي.. م الآخر كلنا بنكمل بعض وكلنا محتاجين بعض. تخيلوا بقى لو كل الناس بقت بتفكر زي مسئولة النظافة ، يا سلام ده الدنيا هتبقى حلوة قوي J
