«روّق عقلك».. منافذ بيع الكتب بأسعار مخفضة خلال نوفمبر
لو بتحب القراءة و عايز تشتري كتب بس ميزانيتك مش كبيرة، هنقولك علي أماكن بتبيع كتب رخيصة و في نفس الوقت جودتها كويسة ومتنوعة، أقصي سعر للكتب في الأماكن دي هيكون 20 جنيه، و كمان هنقولك تروح ازاي و امتي.
فرشة الكتب خانة
مكتبة الكتب خان بقالهم سنتين بيعملو كل يوم جمعة من أول شهر فرشة كتب بيكون أسعار الكتب فيها ما بين 5 و15 جنيه. تروح ازاي؟ تنزل محطة ثكنات المعادي بعدين في طريقتين الأولي عن طريق تاكسي من قدام المترو وتقولو شارع 254 عند شيل شوب ومتدلوش غير 5 جنيه.
او في انك من قدام المترو عربيات بتروح عرب المعادي بتركبها وتنزل ميدان فيكتوريا ومن الميدان هتمشي شارع بمحازاة المدرسة الامريكية لحد متوصل. تروح امتي؟
الجمعة الجاية يوم 6-11
الرصيف الرابع
بيت الرصيف عامل معرض للكتب المستعملة ( من 30 اكتوبر لـ 14 نوفمبر ) ، المعرض أبتدي بـ 20000 كتاب ، و أسعارهم من جنية لـ 20 جنيه.
تروح ازاي؟
بيت الرصيف فيلا رقم 8 في شارع 152 متفرع من ميدان الحرية في المعادي قدام بنك أبو ظبي لو هتركب مترو:
هتخرج من محطة مترو المعادي ناحية شارع 7 هتمشي يمين وتدخل تاني شمال عند أول ناصيه تقابلك هتلاقي بنك أبو ظبي على يمينك وبيت الرصيف قدامه.
لو جاي بعربية أو تاكسي:
هتاخد طريق كورنيش المعادي: هتدخل مدخل المعادي رقم 1 من عند أكاديمية السادات وبعدين أول يمين في أول شمال هتطلع على ميدان الحرية ب هتكمل علطول في نفس الشارع وهتدخل تاني شمال بعد الميدان هتمشي لحد آخر الشارع هتلاقي بيت الرصيف على شمالك فيلا قدام بنك أبو ظبي.
لو هتركب ميكروباص:
هتنزل موقف العرب أو صقر قريش على حسب إنت جاي منين وهتركب ميكروباص بيقول مترو وتقول للسواق ينزلك ميدان الحرية هتدخل شارع 151 من عند صيدلية العزبي لحد ما هتلاقي بنك أبو ظبي على شمالك بيت الرصيف هو الفيلا اللي
تروح امتي؟ مواعيدهم من الساعة 12 الظهر لـ 10 بليل ماعدا الجمعة من 1 الظهر
و متنساش أن مكتبات الجامعة الأمريكية بتعمل خصم 25% علي كتب كتير جدا كل أول سبت من الشهر.
اقرأ أيضا:
