خليك «وحش الطريق» مع دليل السواقة في مصر للمستجدين
اشتريت عربية؟.. فرحان؟.. مش عارف تسوق براحتك؟.. بتحاول ليل نهار تحمي عربيتك من سواقين الميكروباص والنقل العام ؟.. طيب بقيت عصبى ولا لسه؟
عشان تحمى نفسك من أمراض الضغط وعشان محدش يخدعك ويقولك إن السواقة فن.. في عشر حاجات لازم تاخد بالك منهم أثناء السواقة في مصر.
"اللا حارة"
أولا.. مفيش حاجة إسمها إمشي في حارتك في شوارع مصر وإلا هينتهى بيك الحال في "اللا حارة"، ودى لما ميكروباص يرمي عليك من اليمين ووإللى وراك ينتهز فرصة المفاجأة ويطلع لقدام في الحارة الشمال وإنت تفضل في النص.
الحل هنا بيبقى في إنك تستنى الطريق يمشي شويه عشان ترجع أي حارة وتطلع من مطب "اللا حارة".
عربيات التصادم
السواقة في مصر هي نفس فكرة العربيات المتصادمة إللى كنت بتلعبها زمان وإنت صغير. إرمى جنب العربية وإمشي هتلاقي الناس بتخاف منك وتعملك ألف حساب.
وعشان الأمان حب سواق الميكروباص وتعامل معاه بنفس تعاملك مع الثانوية العامة: تحديد مصير، لأن الصراحة سواق الميكروباص أدواته خفية، وممكن في لحظة ينزل ومعاه ركابه ويعملوا الواجب.
وحش الطريق
مبدئيا لو عربيتك (128) إطمن إنت وحش الطريق والناس بتخاف منك. أما لو غير كده فـ "حكة في وش العربية" كفيلة إنها تحميك عشان أي حد سايق بيشوفها بيفكر إنك مش فارق معاك وقلبك ميت وممكن تكسر عليه عادي.
أما للبنات فـ إعملى نفسك راكبة مكوك فضائي وتجاهلي العالم لأن بمجرد إن الناس في الشارع بيلاحظوا إن إللى سايقة بنت بيتحولوا ولسبب ما الكلاكس بيلزق في إيدهم.. ده غير إن كل المشاه بيحسوا بالأمان ويعدوا الطريق فجأة !
متحلمش كتير
في شوارع القاهرة الكبرى متحلمش تجيب أكتر من التالت، إلا إذا كنت سايق يوم الجمعة الصبح أو سايق الساعة 12 بالليل.
خليك أجنبي
لما تبقى رايح مكان إركن العربية في أى مكان نضيف وإنزل إمشى أحسن ما تتلخم بيها. ولو حصل ومشيت في شارع جانبى عكس إعمل نفسك أجنبي وإتفاجأ أو إلزقها في أى واحد صاحب كشك.
the voice
متتفاجئش لما تشوف أتوبيسات النقل العام بتاخد غرز وبيروشوا.. ولو سايق في منطقة سكنية كلاكسك هو بُقك إعتبر نفسك في the voice.
تعايش مع فكرة الزحمة بإسلوب أحمد عدوية لما غنى "زحمة ولاعادش في رحمة مولد وصاحبه غايب"، فمهما حاولت تخرم بردوا وهتلبس في الزحمة بس بردوا ده ميمنعش إنك تشغل مخك.
الفن التشكيلي
متركنش العربية تحت البيت لأن إللى رايح وإللى جاي هيوجب الصراحة والفن التشكيلى بيسيطر على المصريين ساعتها! دور على جراج وإركنها فيه حتى لو هتمشى حبة .
2 ماتسوقش وهمه معاك
نصيحة لوجه الله.. ماتسوقش جنب حد بيعرف يسوق ولا ووالدتك جنبك عشان الإتنين هيكسروا ثقتك في نفسك .
ضابط المرور
إربط الحزام عشان ضباط المرور لما بيشوفوا حد رابطه بيفرحوا أوى وبيتغاضوا عن أي سهو منك لأ وممكن يقفوا في صفك لو حصل حاجة لاقدر الله.
أخيرا.. خليكوا باردين لأن فكرة السواقة في مصر تكفير ذنوب. فـ وإنتم نازلين جهزوا مزيكا، مج قهوة أو شاى.. جهز نفسك لفقرة الملاهى وإبتسم كده.
