لو طالب جديد في «عين شمس» هنعرفك على جامعتك
أكيد كلنا واحنا داخلين الجامعة فى أول سنة بنبقى تايهين فيها، ومش عارفين أولها من اخرها وهنروح فين وهنيجى منين.. لو أنت سنة أولى جامعة مستجد فى جامعة عين شمس أهلا بيك والجامعة نورت، أحنا هنقولك تروح فين وتمشى ازاى.
كافتيريا ميدو
بص يا سيدى لو انت داخل من باب كلية حقوق هتلاقيها على يمينك كافيتريا "ميدو"، ودي أكبر كافتيريا فى الجامعة ومن علامات جامعة عين شمس. هتلاقى فيها كل الأكلات اللى تيجى على بالك، هى على طول زحمة بس لو جعان أكيد هتستنا.
كلية الحقوق
أول ماتدخل من الباب هتلاقيها على شمالك، ولو مشيت قدام شوية هتلاقى كلية الحاسبات والمعلومات، ولو جيت تقعد على السلم بتاعها الامن هيمنعك.
لو مشيت حوالى كام متر هتلاقى كليه العلوم.. خد بالك المعامل بتاعتها "ريحتها وحشة "، ومش هتعرف تقعد هناك.
تصوير
لو عاوز تصور ورق فيه هناك كشك تصوير جنب مبنى كلية الحقوق.. هتمشى حوالى 50 متر كمان هتقابل مبنى الامتحانات فى وشك وده بقا محدش بيقرب منه او يقعد هناك إلا وقت الامتحانات والمذاكرة.
كلية الأداب
تعالى بقا أقولك لو داخل من باب أداب، بوابة كلية الاداب كبيرة جداً، اول ماتدخل هتلاقى شارع طويل فى وشك يمين وشمال لو مشيت يمين هتلاقى مبنى كلية الاداب، وشئون الطلبة هتلاقيها فى الدور الارضى من الكلية.
ولو دخلت شمال هتلاقى فرع بنك مصر وماكينة الصراف الألى ممكن تستخدمها متقلقش .
قصر الزعفران
قصر الزعفران هو قصر كبير أوى قديم واخد شكل تراثى، بيكون فيه مكتب العميد وادارة الجامعة وممكن تدخله من باب أداب على طول هتلاقيه فى وشك، وبردوة لو دخلت من باب حقوق هتلاقيه بعد كشك موبينيل.
فى وش "قصر الزعفران" فيه نافورة كبير، هتلاقي فى الصيف الكل متجمع حواليه، وفى الشتا محدش بيعدى من جنبه هناك.
على أطراف النافورة هتلاقى تجمعات كتير للشباب والبنات عشان فيه هناك شجرة كبيرة معروفة اسمها "الشجرة" بيقعدوا فيها مجموعات كتير من الشباب.
كلية العلوم
كليه العلوم الأسهل ليها الدخول من باب حقوق، عشان هى ملهاش باب مخصص، أول ماتدخل على يمينك وانت ماشى فى الوش هتلاقى مبنى كلية العلوم والمعامل بتاعتها وجنبها كمان كشك لتصوير الورق، وفى الوش كافتيريا الصفوة الأكل بتاعها مش حلو أوى .
كلية الحاسبات
كلية الحاسبات أسهل دخول ليها من باب حقوق، عشان هى كمان ملهاش باب مخصص، المبنى بتاعها صغير جدا، ودايما تحس قدامها بالهدوء لأن الطلبة اللى فيها محدودين جدا.
ده ملخص تجولك فى الجامعة، واكيد انت هتمشى فيها وهتحفظ الطرق بس احنا سهلنا عليك الطريق شوية.
