منى برنس: «الناس بتشتمني عادي ما الرسول اتشتم وقرايبه كانوا هيقتلوه»
قالت عضو هيئة التدريس المفصولة من جامعة السويس، منى برنس، إن موقع فيس بوك حظرها من التعليقات لمدة 3 أيام.
وكتبت عبر صفحتها بموقع «فيسبوك» بعد عودتها للنشر والتعليقات: «بعتذر للاصدقاء والصديقات اللي دخلوا في خناقات مع معاتيه بسبب البوستات السابقة.. معلش هنعمل ايه في الكائنات الهستيريكال متدنية التعليم و الثقافة، والمصيبة الكبرى انهم فاكرين نفسهم كدة متدينين وملتزمين وبتوع ربنا. دول احسن حاجة تجاهلهم».
وتابعت: «عادي يعني، موضوع الشتايم دة، الرسول ذات نفسه اتشتم من قرايبه وكانوا هيقتلوه واضطر يسيب بلده، و من هنا شاع المثل (لا كرامة لنبي في وسط اهله).. بتحصل يعني».
وأشارت: «طبعا في بهايم هتقول لك الحق، دي بتقارن نفسها بالرسول!! ومش هيفهموا الكناية.. ودي حاجة الحقيقة برضه مش هقدر اعمل فيها حاجة لأن دة نتيجة نوعية التعليم بتاعهم.. والكلاب تعوي والقافلة تسير.. وانا القافلة، حتي لو همشي فيها لوحدي».
يشار إلى أن منى برنس، ادعت موقفا جمعها بالشيخ الشعراوي وهي صغيرة، وكتبت: «الحق اقول ذكرياتي مع الشعراوي بقي قبل ما التريند يخلص، زمان وأنا طفلة صغيرة كنا بنتغدى، العيلة يعني، في مطعم ابو شقرة اللي في شارع القصر العيني. وكان الشعراوي بيتغدي مع ناس في صالة خاصة، وأنا شفته».
وتابعت: «قلت لبابا الشعراوي الشعراوي.. باعتباره نجم تلفزيوني بقي كنا بنتفرج عليه يوم الجمعة.. ورحت سلمت عليه لوحدي. الراجل حط ايده على راسي وضحك وقال لي، «أنبتك الله نباتا حسنا.. وأهو زي ما انتوا شايفين انبتني احسن نبات والله».
