رايحة الجامعة ومحتارة البس إيه؟
كل بنت وهى داخلة الجامعة جديد بتكون مرتبكة ومشتته ومش عارفة أيه اللبس اللى ممكن تلبسه، وبتسأل نفسها يا ترى هيكون مناسب ؟ ياترى حد هيبقا أشيك منى ؟ حاجات كتير بتيجى فى بالها، وبيبقى صعب عليها أوى الاختيار بسبب الخوف والخجل من أختيار شئ جديد وده بيدفعها انها ممكن تجيب حاجات كتير مش لايقة عليها؟؟ هقولك شوية حاجات عشان تعرفى تختارى اللبس المناسب للجامعة .
الألوان
وانتى بتشترى اختارى الملابس المناسبة للون بشرتك، ياعنى لو كانت بشرتك سمرا البسى حاجة فاتحة عشان تظهرك، أما لو بشرتك فاتحة هتلاقى الوان كتيرة لايقة عليكى. وانتى بتشترى لبس ماتحاوليش تجيبى ألوان فاتحة كتيير عشان مش هتستحمل يوم الجامعة لأنه بيبقا كله حركة طول النهار، ولما تتبهدل هتحسى بمشكلة كبيرة. اختارى دايماً الالوان الوسط زى (الموف، الفوشيا، والبيج).. الدرجات دى هتبقا سهلة معاكى ومش هتتبهدل بسهولة.
البساطة
كل ماكان لبس الجامعة بسيط بيبقى أجمل، لأن التعقيد بيفسد كل حاجة ليها علاقة بالبساطة، ياعنى خلى لكل حاجة وقتها ومتحاوليش تلبسى حاجات كتيير فوق بعض عشان أنتى هتتحركى كتير. أبعدى كمان عن الملابس الرسمية واللى فيها أكسسورات وتطريز كتير لأنها مش تناسب الجامعة، وبتبقا مناسبة أكتر فى الخروج باليل.
هوس الموضة
ماتحاوليش تجرى ورا الموضة وتقلدى حد، ياعنى جيبى كل اللى يناسب شخصيتك وطبيعتك، مش شرط يكون موضة. خدي بالك من نوع القماش ياريت إنك تختاري الملابس اللي بيكون قماشها قطن أو كتان، وابعدي نهائيا عن الأقمشة اللي بتكون مصنوعة من البلوستر لأنها بتكون مضرة جدا للبشرة .
الميك أب
لو بتحطى ميك أب حاولى تخدى بالك كويس وانتى بتحطى، عشان انتى رايحة الجامعة مش رايحة سهرة ياعنى تحطى خفيف وميكونش أوفر، ياعنى كحل وكونسيلر لو عندك هالات سوداء وروج خفيف، وأعرفى أن شكلك بيدل على المكان اللى انتى رايحاه وحاجة زى دى فى المحاضرات والسكاشن هتدى عنك أنطباع سئ. لبسك بيدل على شخصيتك ودى نقطة مهمة جداً ياعنى متحاوليش تقلدى حد، لان كل واحد وليه شخصيته المستقلة ياعنى ماتلبسيش حاجة قصيرة أو شفافة لمجرد إنك بتقلدى حد لأن ده هيضرك انتى مش هيضر حد تانى، ياريت يكون عندك شخصيتك المستقلة فى أختيار لبسك. وأخيرا.. خليكى دايما واثقة فى نفسك وفى أختياراتك ومتخافيش من أى تجربة أكيد قبلك مروا بيها واستفيدى دايما من خبرات اللى قبلك .
