شريف مدكور يعلن إصابته بفيروس ليس له علاج (فيديو)
أعلن الإعلامي شريف مدكور، في مقطع فيديو نشره على صفحته بموقع التواصل الاجتماعي «فيسبوك»، سر غيابه عن الظهور طوال الفترة الماضية.
وذكر مدكور: «أي مريض كانسر، يخضع للعلاج الكيماوي، مناعته بتقل، والفترة الأخيرة، تجاهلت الإرشادات الطبية، وكابرت وعافرت ونزلت الشغل، وسوقت العربية، وكنت بأسلم على أي حد بأقابله، فجالي فيروس في الدم».
وتابع «لا أتذكر اسم الفيروس، هو مالوش علاج للأسف، لازم الجسم هو اللي يطرده، ونسبته عندي 900، في الوقت اللي بتوصل فيه عند باقي الناس إلى 150 أو 200، بقالي شهر وأسبوع مصاب بيه، وحرارتي وصلت لـ39 ونص، الجسم عندي بيحاول يتخلص منه، لكن عندي أناميا، والمناعة قليلة بسبب العلاج الكيماوي».
وقال «الحرارة الحمد لله قلت عندي، وإمبارح كتبت بوست أني كنت في المستشفى، ونقلت دم، عشان الجسم يقوى، ويطرد الفيروس، أنا اللي أهملت، وعافرت في الشغل، مش عايز حد يقلق، أو يخاف من مرضى الكانسر، أنا اللي قصرت في حق نفسي».
وأوضح: «أنا عامل الفيديو ده مخصوص لكل مرضى الكانسر، متقلقوش، الحمد لله، خلوا بالكوا على نفسكوا، ابعدوا عن الناس، بلاش السلامات والأحضان والبوس، عشان المناعة، أنا بس كنت بأخاف أن الأطفال يزعلوا لو مسلمتش عليهم، الفترة الجاية مش هأقدر أسلم على حد، هاضطر أحط كمامة، الحمد لله، أنا بخير، وربنا يشفي كل مريض إن شاء الله».
