والد محمود البنا بعد الحكم على راجح: كان نفسنا يكون في عدل في مصر (فيديو)
علق والد محمود البنا، المعروف إعلاميا بـ«شهيد الشهامة»، على حكم السجن لقاتل نجله 15 عاما، في مداخلة هاتفيه مع الإعلامي عمرو أديب، ببرنامج «الحكاية».
وقال والد محمود البنا: «كنا متوقعين حاجة غير الحكم اللى صدر واني يكون في استثناء اي حاجة تشفي غليلنا وترجع حقنا اللى هو شرع ربنا وتنصر العدل على الظلم».
وأضاف: «احنا مشينا على القانون ولن نشكك في القضاء وبنحترم الدولة، لكن برضوا لازم نحترم ربنا وشرع ربنا ان يطبق شرعه في القاتل، ولو تم الاعدام على الأربع متهمين هيكون جزء من حقنا وحق المجتمع وبادرة أمل للعدل في مصر».
الحكم على راجح و3 متهمين في قتل محمود البنا
وتابع: «لو في عدل مكانش واحد وقف هتف جوه قاعة المحكمة، ومحامين القاتل كانوا يقعدوا يهزروا في الأربع جلسات ويقولوا أنهم هياخدوا الولاد وهما ماشيين ويتريقوا على المحامين بقولهم هما مفكرين انهم هياخدو أحكام ويهمشوا من الموضوع وديما يصدر منهم الكلمات الجارحة ومحدش بيحاسب الناس ده على مشاعر الإنسانية».
وأوضح:«كفايا الناس اللى اتحبست لحد النهاردة علشان قضية محمود والى مطلعوش، والملايين المناشدين لحق محمود كان يجب أن يكون لهم اعتبار، انا طلبت من القاضي الاستثناء في محاكمة قاتل ابني واني عاوز حق ابني بشرع ربنا ازاي بقى تيجي باستثناء من الرئيس او القضاء او تيجي باي شكل لكن ده متمش».
وذكر والد محمود البنا: «احنا من ضمن الشعب الفقير الغلبان، كنت بقول لابني لو جبتلي مشكلة في يوم هكون ضدك مش هساندك وطلعنا شاب محترم للمجتمع وقتل، وكان نفسنا يطبق شرع ربنا والعدل في مصر ونحس بالأمان».
