مع «شبابيك».. خروجتك أحلى في الشتا
الشتا بيحب اللمّة والفُسح والخروجات.. اللي الضحك والهزار فيها بيدفينا وينسينا سقعة الجو :) . وعشان خروجتكوا تبقى في مكان مختلف وحلو، "شبابيك" جمّعتلكوا شويّة كافيهات ومطاعم مقفولة عشان الدفا، عشان تقدروا تخرجوا فيها خروجة متتنسيش.
كافيه ومطعم Matigoo Lounge
كافيه "متيجو" موجود في "مول اميرالد امباير، في التجمع الخامس عند أكاديمية الشرطة"، وبيبقى مفتوح من الساعة 9 الصبح لواحدة بليل، وفي فرع تاني كمان موجود في شارع 9 بالمعادي رقم 45.
أسعار المشروبات في "متيجو" معقولة جدًا، وكمان فيه أصناف مختلفة من الأكل بأسعار مناسبة، المكان نفسه قعدته هادية ومريح للأعصاب.
مطعم Bistro
مطعم بيسترو فيه أكلات كتير، بس البيتزا بتاعته وهمية وليها مذاق خاص، وخصوصًا "الكريزي تشيكن". بيسترو ليه فروع كتيرة، بس أحسن فرع هو اللي في ميدان الإسماعيلية عند السلام شوبينج سنتر.
كافيه ومطعم Na2n2a
نقنقة مكان مليان ألوان والقعدة فيه مُبهجة، وأسعار المشروبات والأكل فيه معقولة جدًا، عندك مثلًا السندويتشات أسعارها بتبدأ من 20 جنيه، والمشروبات من 15 جنيه. نقنقة موجود في 3 شارع الثورة الكوربة.
مطعم سكلانس
المطعم ده بيقدم أكلات مختلفة، زي مثلًا السجق المشوي بالجبنة، كبدة وحواوشي بالسجق، ومكرونة بالسجق، ده غير أن الديكور بيدّي جو مبهج، مع تشكيلة أغاني لباندات شغالة في المكان طول اليوم. المكان هناك هيروّق أعصابك من أي دوشة؟
أسعار الأكل معقولة هناك مش غالية، ومكانه في شارع البحر بمساكن شيراتون بعد فروزي تويست على طول وشاورما الريم.
