ماذا لو تم تعطيل الدراسة 6 أشهر؟.. وزير التربية والتعليم يجيب (فيديو)
قال وزير التربية والتعليم، الدكتور طارق شوقي، إنه في حال تعطيل الدراسة 6 شهور لن ينجح أحدا وهنعوض السنة التي تفوت الطلاب.
وذكر الوزير في مداخلة مع الإعلامي عمرو أديب، على برنامج «الحكاية»: «أن الترند مش هو المحك والسوشيال ميديا مش هي اللي بتتحكم في ملايين الطلاب، ونسبة الإصابة في مصر بالأرقام المعلنة نصف في المليون، حاجة لا تذكر ولا تستدعي كل الهلع اللي على مواقع التواصل».
وأضاف: «اتقال إن هناك اجتماع لمجلس الوزراء وأنا ماسبتش مكتبي أساسا ولم يحدث ما تردد عن وجود خلافات داخل مجلس الوزراء بسبب قرار تعطيل الدراسة».
وأوضح: «يا جماعة مفيش حاجة تستدعي هذا الهلع، مفيش حالة واحدة لطالب أو طالبة في مصر، من أين نأتي بهذه الحالة، الناس لازم تبقى معانا ومدركة إن قرار تعطيل الدراسة ليس قرارا عبثيا بناخده على السوشيال ميديا».
وأكد أن «الدولة اللي بتاخد قرار تعطيل دراسة معناه أن البلد فيها وباء وده يأثر على الاقتصاد والسياحة والطيران، واحنا واخدين اجراءات احترازية قولناها كثيرا».
وتابع: «الهاشتاج على السوشيال ميديا عايزة الناس تقعد في البيت، إذا اضطررنا لأسباب خارجة عن الإرادة وهو ليس الوضع الحالي، إحنا لن نتنازل عن أن كل طالب يحصل المحتوى المطلوب».
وقال وزير التعليم: «مفيش حد هياخد اجازة مفتوحة، إذا اضطررنا لتأجيل الدراسة 6 شهور هنفضل في نفس السنة الدراسية، مش من المقبول لأي واحد مسئول أنه يوقع على ورقة بتقول إن فلان ده عنده المعرفة الكافية إنه يطلع السنة اللي بعدها».
وأضاف: «مش معقول واحد في طب مش هياخد نص التشريح وهينجح، إذا بالعقل كدة بنحاول نلاقي بدائل علشان ولادنا ماتتعرضش لده، الكلام على أننا مش خايفين على ولادنا ده كلام لا يليق».
«الحقيقة إن اللي بيصدر هذه الحالة من الهلع هي الجهات اللي عايزة الحالة دي تبقى موجودة، كل ما يثار على السوشيال ميديا من تأليف وإخراج من يكتبه، والخسارة من تعطيل دراسة 25 مليون طالب خسارة كبيرة جدا، وإحنا وظيفتنا التعليم وأي أب وأم اعتقد عايز ولاده يتعلم، احنا بنحاول وبنفكر وفيه غرفة أزمات، وأن تم الاستقرار على أن هناك أسباب وجيهة لقرار تعطيل الدراسة لن نتردد عنه»، هكذا علق الوزير على تعطيل الدراسة.
