رغدة جلال تكتب: كيف تصبح نحاتا فاشلا؟
لكل اللي عايز يبقى نحات فاشل وكل الناس تشاور عليه ويقولوا "يا حبيبي ايه الفشل ده يا بخت عيلتك بيك" وكمان الإعلام والصحافة يتكلموا عنك في أخبارهم وفي برامجهم وتبقى حديث الناس على الفيس بوك وتويتر الفرصة جتلك لحد عندك، ففي الموضوع ده هنقدملك خطوات تمشي عليها عشان تحقق فشلك وتتفشخر وسط الناس.
شخصية
حدد انت عايز تنحت مين، ناس حواليك ولا ناس مشهورة وطبعاً لو اختارت انك تنحت ناس مشهورة ده هيبقى الإختيار الأصعب اللي هيثبت قد ايه قدراتك الفشلية وبما انك عايز تبقى نحات فاشل معروف وسط الناس فالإختيار ده هيبقى الأحسن ليك لأنه هيعرف العالم كله عليك وهيبقى نحتك بجلاجل.
أدواتك
جيب طينة بس حاول انها تكون مبلولة شوية لا ناشفة أوي ولا طرية أوي فممكن تجيبها من أي حديقة حواليك يكون مرشوش فيها ماية وخلي معاك كيس بحيث تحط فيها الطينة اللي هتشيلها من الزرع أو استغل كمان فرصة الدنيا لما تمطر وامشي في الشارع ولم الطينة اللي هتلاقيها في الشارع.
جيب سكينة من أي محل مستلزمات بيت عشان تنحت الطينة وانت بتعمل الشخصية، ومتنساش الألوان عشان تلون بيها الوش وطبعاً الألوان هتلاقيها في أي مكتبة حواليك ومتنساش تختار الألون اللي تشد الناس وتخليهم مبحلقين عينيهم.
المكان
بعد لما خلصت نحت التمثال جه الوقت انك تختار المكان اللي هتحطه فيه وطبعاً حاول تنقي مكان في ميدان عام بحيث الناس تشوفوا من كل اتجاه ويقولوا ايه الفشل ده ايه الفشل ده.
الشكل النهائي
Wait
لو سمحت
- كل اللي انت قريته ده متعملوش خالص لأنه بيدمر الرؤية وخطر على القلوب الضعيفة وبيعمل تسلخات فنية في المجتمع وهيبقى علامة سودة في تاريخك الفني لو فكرت تعمله، ولو عايز تتعلم النحت لازم تكون فنان موهوب ولو معندكش الموهبة ديه سيب النحت لناسه والنبي.
