سفرية تركيا من الفيزا لطيارة الرجوع

بنشوف مسلسلات وأفلام تركي كتير، وعينينا بتزغلل لما نشوف الشوارع واسعة ونضيفة والمناظر الطبيعية والجناين والأخضرات في كل حتة هناك، ياسلام على الناس كمان أشي خيال يا ناس! شياكة وجمال حاجة فل!

طيب كام مرة قولت في سرك أو بعلو صوتك "يــــــــــارب أوعدنا يـــــــارب"، لو عايز تسافر تركيا وتتفسح وتهيص، دلوقتي تقدر تعرف إجراءات السفر والعيشة هناك وتزور ايه، وايه الورق اللي محتاجه كمان.

• جواز السفر

عشان تسافر أي مكان في العالم لازم يكون معاك باسبورك أو جواز السفر يعني، روح بسرعة مكتب الجوازات اللي تبع منطقتك ومعاك 3 صور خلفية بيضاء مقاس 3X 6، والبطاقة وصورتها والمؤهل وصورته، وادفع الرسوم اللي بتبقى حوالي 170جنيه، وشوف هتستلمه امتى.

• التأشيرة

التأشيرة بقى حكاية تانية، بسيطة جدا ما تقلقش كده، التأشيرة لتركيا بتملاها أون لاين من الموقع ده https://goo.gl/xoGaOU ، وتدفع الفلوس بالفيزا كارد، وسعرها غالبا هيكون 20 دولار بالكتير، حلو الكلام؟

لو مطلعتش التأشيرة هتلاقي ماكينات في مطار تركيا (مطار اتاتورك) تطلع منها التأشيرة أو من ممر الجوازات في المطار هيطلعوهالك.

• إذن السفر

لازم تطلع "طلب إذن سفر" من مجمع التحرير، يعني بالعربي كده موافقة أمنية قبل السفر، عادي مش لبش ماتخافش، إجراءات أمنية بس، وطبعا تملى الطلب قبل السفر بوقت كافي مش أقل من اسبوعين عشان تلحق تاخد الإذن.

• العملة

أوعى تنسى تغير عملة قبل ماتسافر، اطلع على الصرافة وغير عملتك من جنيه إلى ليرا، وسعر الجنيه 38 ,0 ليرا عشان تبقى عارف.

• الفنادق

وصلت تركيا خلاص؟ حمد لله على السلامة، عارف هتنزل على فندق ايه؟

ده موقع http://goo.gl/kObue2 لحجز فنادق في تركيا ومعرفة أماكنها في اسطنبول بقى ولا بورصة ولا أنطاليا ولا ايه، وشكل الغرف وسعر الغرفة في الليلة وكام فرد وكل الحوارات دي

• أماكن تزورها

عايز طبعا تتفسح وتهيص دلوقت، اعرف الاماكن اللي تروح تزورها في تركيا دلوقت

• ايا صوفيا

أكيد سمعت الاسم ده في مسلسل "حريم السلطان" ده أعظم مكان سياحي ومتحف موجود في تركيا، يعني من الاخر كده روحت ايا صوفيا تبقى روحت تركيا، ومفتوح كل يوم ماعدا الاثنين من الصبح لحد العصر

• السوق المغطى

ده واحد من اكبر الأسواق المغطاة في العالم، تلاقي فيه بقى ملابس وذهب وكل المحلات اللي تخطر على بالك، واتفرج يا سيدي واشتري

• شلال صودوشان

نفسك تشوف شلال وتحس انك في تركيا بجد، يبقى عليك وعلى شلال صودوشان في مدينة يالوفا، اللي حواليه اشجار وطريق تحفة تتمشى فيه وتسمع صوت المياه، هو في أحلى من كده!

• بحيرة أبانت

قمة الهدوء والجمال، اطلع على بحيرة أبانت في مدينة يالوفا، وريح عينيك شوية واتفرج على المياه الزرقاء النقية وحواليها الشجر وفوقيها السماء ناعمة، ياسيدي على الروقان!

• جسر البوسفور

شوفته أكيد في كل المسلسلات التركي، ايوه هو اللي عليه لمبات بتنور بليل كده، ده رابع أطول جسر في العالم اللي بيوصل اوروبا باسيا، وده برده من اهم معالم تركيا

أماكن كتير هتتفسح فيها وتتبسط وتخرج من الروتين والكآبة، وتشوف ناس جديدة، وتتعرف على ثقافة تانية، ياعم سافر واتصور واتبسط وتعالى احكيلنا.