عزيزي الطالب.. اعرف دكتورك وحطه في جيبك
دكتور الجامعة هو عقدة كل الطلبة، والنجاح في مادته بيبقى العقدة الأكبر، يعني على طول بتسمع شتايم وانتقادات للدكاترة، والأسباب كتير يعني يا إما الدكتور عصبي أو بيحب الطلبة تمدح وتنفخ فيه أو حاسس بنفسه حبتين ومغرور شويتين أو مش فاهم أي حاجة في أي حاجة، سيبك من الدكتور المهم أنك تعرف ازاي تتعامل معاه وتضمن النجاح في مادته كمان.
- العصبي
هتلاقي النوع ده من الدكاترة كتير اوي، الدكتور اللي صوته عالي وجايب أخر الجامعة، يا أخي ده عروقه خلاص هتنفجر من الزعيق، خليه يزعق وبكل هدوء قوله "تمام، عندك حق، كلامك سليم" وحسسه أن كلامه كله صح، واعرض وجهة نظرك ورأيك براحة، بس اوعى تهزر أو تضحك، ده عصبي مش وقته هزار خالص، ولا تتعصب انت كمان وترد كلمة بكلمة أو تتقمص، اهدى ووضحله سبب الخطأ وخليك كيوت أوي، هتلاقيه بدأ يهدأ، يعني من الاخر كده هتبقى دلقت مية على النار، والنار هتنطفي وتبقى فل.
- يحب المديح
طبعا هتقابل النوع ده من الدكاترة اللي بيحب المدح والنفخ و"الله عليك يا مورجن" والجو ده، عارف هتتعامل معاهم ازاي؟ اوعى تبخل عليه بكلمتين امدحه ودلعه اوي، ده هيحبك جدا كده، لأنه عاوز يحس بنفسه شوية، وماله حسسه بنفسه مش هتخسر حاجة، مش نفاق ولا تظبيط ولا الكلام ده، بس تعامل بذكاء شوية، وراحة ليك وله.
- الجاهل
اكتر نوع ممكن يتعبك أوي لأنه مش فاهم أي حاجة في أي حاجة، يعني لا بتاخد منه حق ولا باطل، وأي سؤال هيهرب منه أو يفتي، ولو جيت انت اتفزلكت هتتبهدل، طب والحل؟ خلي كلامك دايما يحمل معنى "عاوز اخد رأيك في حاجة" أو "انا شايف كذا ايه رأيك" طبعا هو مش فاهم بس اسلوبك ده هيخليه يشيلك على راسه ويقولك رايك صح وتمام بس تبقى جاية منه مش منك.
- المغرور
ده بقى اللي بتلاقيه فرحان بنفسه جدا وشايف انه أعلى من البشر، وقدراته اخترقت قدرات سبايدرمان، والطلبة دول المفروض يقعدو ينهلو من علمه ويتعجبو ويدوسو لايك ويقولو "سبحان الله" كمان، النوع ده بقى لازم تلفت انتباهه دايما أنك بتتعلم منه ومنبهر بيه واسلوب "هو اللي م أكلنا، هو اللي م شربنا" والجو ده، وكل كلمة تقول "زي ما قولتلنا يا دكتور قبل كده" وارجع كل حاجة اتعلمتها او بتقولها له، ساعتها هيفرح بيك اوي.
- الشتام
النوع ده قليل من الدكاترة بس موجود، ولازم تعرف ازاي تتعامل معاه كويس، تفتكر ممكن يشتم ليه إلا إذا كنت استفزيته أو عملت حاجة جننته! أسلم طريقة للتعامل مع الشخص ده أنك تبعد عن طريقه، ايوه يعني ما تعملش أي حاجة تنرفز سيادته وخليك أمور وجميل خالص، وابعد عن المواجهة أو أنك تتحط في موقف معاه.
من الاخر كده عايز تعيش وتنجح في الجامعة أو في الشغل أو أي مكان، لازم تعرف ازاي تفهم رئيسك وتتعامل معاه وتثبته وتحطه في جيبك كمان، بس انت ذاكر بقى.
