6 مقترحات «مجنونة» للمذاكرة في الوقت الضائع
الامتحانات قربت وانت مش عارف تذاكر وحاسس إن الوقت ضيق. متقلقش.. هنقدملك 6 أفكار «مجنونة» تشاركها مع زمايلك تساعد نفسك وتساعدهم في المذاكرة.
قطّع الكتاب
جمع زمايلك اللى فعلا عايزين يذاكروا وابعد عن مجموعة «المطنشين»، وقطع الكتاب بعد نهاية كل فصل ووزع الفصول كلها على عدد صحابك، كل واحد فيكوا هيذاكر الفصل كويس ويلخصه بخط إيده وتتجمعوا في بيت حد منكوا أو تقعدوا على أي قهوة أو كافية وتبدأو تشرحوا لبعض وتصوروا الملخصات اللي كتبتوها بنفسكم.
بالفلوس
أكبر مشكلة بتقابلك لو بتذاكر مع صحابك «الرغي» الكتير، حدد أنت وصحابك الأيام إللي هتذاكروا فيها، وانتوا قعدين مع بعض اقفلوا تلفوناتكوا واللي هيبدأ فيكوا بالكلام هيدفع فلوس و حط (حصالة) قدامكوا عشان تفكركوا كل شوية.
ممكن تعمل مسابقة مع صحابك، آخر واحد في المجموعة هيخلص مذاكرته أو مش هيكون مركز هيعزمكوا كلكوا على العشاء.
ركّب المادة
مش كلنا بنحب نذاكر مع زمايلنا، عشان كده ممكن نستغل أي موهبة لينا في المذاكرة مثًلا لو بتغني وصوتك حلو أو بتعزف أو بترسم، ركب مادتك علي موهبتك:
-
ركب المادة على أغنية أو اعمل المادة كلمات أغنية واحفظها زي «أحمد حلمي لما حفظ البنت الصغيرة جدول الضرب فى فيلم مطب صناعي».
-
قسم المادة بتاعتك إلى رسومات وأحفظ شكلها يعني مثلا لو المادة فيها فصول و محاور وعناصر كتير أرسم شجرة كبيرة بفروع.. وأبدع يا فنان.
-
لو بتعزف على أي آلة وحافظ ألحان كتير ممكن تذاكر المادة على لحن معين وتربط الفصول والمعلومات المهمة بالمقامات والنقلات الموسيقية.
اسمع نفسك
لو بتحب تذاكر لوحدك عشان تركز أكتر، سجل لنفسك وانت بتحفظ وبتسمع، وبدل ما تسمع أغاني أو راديو فى الطريق أو حتى تفضل تشيل الورق والكتب والملخصات في إيدك.. اسمع اللي كنت بتذاكره وبتسمعه بصوتك هيفكرك أسرع.
بالكورة
نسبة كبيرة جدا من الشباب بتحب تلعب كرة قدم، وأكيد طبعا في ولاد وبنات بتحب رياضيات تانية، الهدف هو لعب أي رياضة بتجمعك أنت وصحابك، قسم مادتك على نصين الشوط الأول والتاني، والفريق الخسران يشتري الملازم والكتب لأي مادة تانية.. عامة المذاكرة في الملعب مع الصحاب بتغير مود وتشجع مش بتضيع وقت، لأن قرار المذاكرة والنجاح بيرجعلك في النهاية.
لعبة قديمة
واحنا صغيرين لعبنا كلنا لعبة «اللي هيتكلم يبقى حمار» لعبه محدش ميعرفهاش بس بتجبرنا إننا نسكت ومحدش يتكلم، جمع صحابك وقبل ما تذاكر اتفق معاهم على اللعبة ،طبعا اللي هيتكلم هو عارف هيتقال عليه إيه ولو عايزها بشكل جدي ممكن تضيف عليها غرامة بفلوس.
