للطلاب.. خدلك «بريك» في 3 أماكن بجامعة القاهرة
كتب- نورهان عصام
لو كنت طالب في جامعة القاهرة وعايز تبعد عن ضغط الدراسة، و عندك وقت فراغ بين المحاضرات، و مش لاقي مكان هادىء تأكل و تقعد فيه على راحتك.. «شبابيك» هتعرفك على 3 أماكن تقدر تقضي فيها وقت بعيد عن جو المحاضرات.
كافتيريا «time out»
في كتير من الطلاب بيسموها «الجبلاية» وموجودة بجانب كلية الإعلام خلف مبني قاعات الإمتحانات، وبتتميز الكافتيريا دي عن غيرها من الكافتيريات في باقي الجامعة بالجو المنعزل عن المحاضرات والدكاترة والكليات، وفيها مقاعد وطاولات وأماكن مخصصة للمشروبات والمأكولات بمختلف أنواعها، وكمان في أماكن في الكافيتيريا ينفع تذاكر فيها أو تقرأ كتاب خارجي .
«مونجيني»
«مونجيني» عبارة عن سلسلة محلات للحلويات، وفتحت فرع ليها السنة اللي فاتت جوة الجامعة،جنب كلية التخطيط العمراني والإقليمي، قدامه ساحة كبيرة بيستغلها كتير من الطلاب في عمل مناسبات زي أعياد الميلاد والحفلات.
«المكتبة المركزية»
بعيدًا عن جو الترفيه والمناسبات، لو كنت من محبي القراءة أو الثقافة عامة أو عاوز جو هادي تذاكر فيه، فموجود عندك المكتبة المركزية الجديدة أمام كلية دار العلوم، وهناك هتلاقي كل الكتب اللي ممكن تحتاجها ووثائق ومراجع وصحف، كمان بيقام فيها بانورما للحروب والثورات اللي مرت بها مصر، وكل ده مش هيكلفك إلا خمسة جنيه رسم دخول المكتبة أو إشتراك عام في السنة كلها مش هيزيد عن 40 جنيه.
