للطالبات.. الطريقة المثلى للتعامل مع «الكائن السوسن»
بنقابل كل يوم شخصيات بتتعامل معانا بطريقة غلط بيكون فيها شوية «سهوكة» على حبة دلع ورغي بنات.. المشكلة بقى إن كائنات «السوسن» دي بقت منتشرة في الجامعة بشكل لا يطاق، بنضطر نتعامل مع كتير منهم عشان بيكون إما الدكتور في المحاضرة، زميل في السكشن.. أو موظف الشئون.
لو عايزة تعرفي الكائنات السوسن دي وإزاي تتعاملي معاهم اقري اللي جاي :
كائنات السوسن
هم كائنات خانة النوع في بطايقهم مكتوب فيها «ذكر» لكن للأسف تحسي في تعاملتهم معاكي إن أختك سوسن هي إللي بتتكلم، بداية من «أيوة يا روحي»، «القمر عايز إيه» وطبعا الكلام ده مفهوش مشكلة إلا لو اتمزج بشوية غمزات على تسبيل بالعين وياسلام لو تطور الوضع لطبطة على الأيد والكتف.. لو مكنتيش تعرفي مين هما السوسن أديكي عرفتي.
أتصرف إزاي؟
حسب وضع ومكانة كل شخص، يعني عشان متضريش نفسك وتتعاملي غلط مع حد ممكن يسببلك مشكلة، خصوصا لو كان الدكتور بتاعك.. اعرفي مع كل واحد ممكن تعملي إيه:
الدكتور
وسط 10أساتذة ودكاترة محترمين هتلاقي دكتور بيحب كلام ودلع ولمة البنات حواليه، وإنتي طبعا بتكشيرة أخوكي إبراهيم واحترامك لنفسك لو دخلتي كلمتيه بطريقة «الهجمة المرتدة» ووضعية الدفاع هيشيلك المادة بتاعته وأبقي قابليني لو نجحتي.. الحل:
- لو عوزتي أي حاجة من الدكتور «السوسن» ادخلى مع صحباتك البنات ولو ليكي زمايلك ولاد خليهم يكونوا معاكوا
- كلام التبجيل والمدح في الدكتور هيجيب نتيجة معاه خصوصا لو كنتوا مجموعة بنات مع بعض مش هيعرف يضايقكوا كلكوا مع بعض.
الموظف
موظف الشئون في الأغلب مصلحتك عنده بتكون بشكل مؤقت، يعني مش هتحتاجيه طول السنه، بس لازم تأخدي بالك إنك هتحتاجيه كل سنة لحد ما تتخرجي:
- في نوعية تنفع معاها لبس «الوش الخشب» إللي هو تكشيرة حلوة مع الضحكة الصفرا والرد على قد الكلمة.
- وفي ناس تانية ممكن تتعاملي معاها معاملة المضطر «لو سمحت عايزة كذا..، فيبدأ سوسنته، فتردي :هههه عندك حق أو شكرا لذوقك» وأعملي نفسك مشغولة وبتتكلمي في التلفون .. وخلصت مصلحتك.
الطالب
زمايلك في الكلية زيهم زيك، يعني إللي فيهم هيضايقك معندكيش غير «الوش الخشب» وغير كده لا.. لأن الكائن السوسن بيتغذى على معاملتك ليه. لو فضلت حلوة هيزود في تصرفاته ولو وقفت معاملتك إنسي هيختفي ويتبخر، وأهم حاجة إنك تكسفيه تبعدي عنه لو وقف قدامك وقرب منك تتجاهليه يعني إعملي معاه «الصح»، وقولي ليه وداعًا يا كائن السوسن :).
