رغدة جلال الدين تكتب: كلام بتحب تسمعه البنات
البنت مننا لو سمعت كلمة حلوة ممكن مودها الوحش يتقلب 180 درجة لمود مبهج، وده لأننا حساسين بطبعنا.
وزي ما الكلمة الوحشة بتعكنن مزاجنا الكلمة الحلوة بتأثر فينا وعشان كده جمعت ليكوا شوية كلام حلو تعيشوا معاه إحساس المود المبهج :)
أنا بحبك
لما تكوني بتحبي حد والحد ده بيحبك بس مبيقولش وأنتي نفسك يقول وتلاقيه في يوم كدة جاي قايلك «أنا بحبك» بتحسي أتولدتي من جديد والحياة كلها بقت بمبي في بمبي.
شكلك خاسس
الجملة دية لما بتتقال لينا بتدينا ثقة في أننا نكمل في الريجيم ونخس كتير عشان نسمع الجملة دي تاني وننبسط بنفسنا.
شغلك عظيم
لما تكوني مضغوطة في شغلك ومتوترة جداً وحد يقولك الجملة دية بتحسي إن توترك كله راح وتعبك جه بفايدة واتشكرتي عليه.
الله أنتي حلوة النهاردة
لما بتتقال ليكي في وسط يوم مودك فيه مش لطيف، بتفرق معاكي وبترسم إبتسامة على وشك :)
هتبقي اللي أنتي عايزاة
لما بتتقال ليكي أو تتبعتلك في رسالة فجأة في وسط إحباطك بتحيي فيكي الإرادة أنك هتنجحي وهتوصلي.
شكراً أنك موجودة
لما تتشكري على وجودك في حياة حد ده بيحسسك قد أيه أنك مؤثرة في حياة الناس.
