نصائح للطالب.. ازاي تعدي السنة نضيف؟
لأنك لازم تنجح وتجيب تقدير عشان تشتغل وتشوف حياتك وتجيب تقدير فيها برده، «شبابيك» هتقولك على شوية نصايح كدة تمشي عليها عشان متشلش أوبح :D
افهم متحفظش
حاول انك تفهم المواد مش تحفظها لأن الحفظ ممكن يروح منك وانت بتحل لكن الفهم مش هيروح أبداً وهيفضل معاك ولو اعتبرت ان فهمك للمواد مش بس هينفعك في الدراسة لأ ده كمان هينفعك في الحياة ده هيديك دافع وهتلاقي نفسك عندك استعداد انك تستقبل كمية كبيرة من المعلومات.
اخرج مرة في الاسبوع
اخرجي مرة في الأسبوع في أي مكان جديد بحيث تغيري مودك عشان ترجعي تذاكري بحيوية ونشاط.
اكتشف موهبتك
شوف انت موهوب في ايه وادعم موهبتك ديه لأن الموهبة هتقدر تفرغ فيها ضغطك من المذاكرة، وفي وقت أجازتك مش هتكون فاضي لأنك هتكون عايز تعلى فيها.
السرير
متحاوليش تذاكري أبداً على السرير لأنه هيخليكي عايزة تنامي، ومهما أقنعتي نفسك بإنك هتذاكري في الأخر بتلاقيكي نمتي والكتب نايمة حواليكي.
الكافيين
ابعد عن شرب المشروبات اللي فيها نسبة كافيين عالية وانت بتذاكر وخاصة بليل زي مثلاً القهوة والنسكافيه، لأنها هتخليك مفوق مع إن جسمك عايز ينام وده طبعاً هيبقى ليه ضرر كبير جداً لأنه هينسيك انت ذاكرت ايه وهتصحى جسمك مكسر ومش مركز و لا هيكون عندك حيل انك تستوعب حاجة .
