هل توجد مكاتب تنسيق للجامعات خارج مصر؟
المكان إللى غير حياة المصريين بنسبة كبيرة و الحاجة الوحيدة إللى موجودة فى مصر و مسمعناش عنها في جامعات بره مكتب التنسيق، معظم دول الغرب مفيش فيها مكاتب للتنسيق زي عندنا. ليه بقى؟ طب الناس دى عايشة إزاى من غير مكتب التنسيق؟ و إزاى بيدخولوا الجامعة؟
التقديم فى الجامعات بره مصر بتبقى عملية طويلة غالبا بتبتدى خلال أخر تيرم للطالب فى السنة القبل الأخيرة إللى هى فى أمريكا ال 11th grade وهنا الطالب بيبتدى يحدد إهتماماته و يحدد أنهى جامعة متميزة فى الإهتمامات دى و أنهى جامعة مناسبة ماديا ليه. كمان بيساعد الطالب فى العملية مرشد أكاديمى .
فى ال 12th grade و دى السنة النهائية للدراسة فى أمريكا و بتكون فيها مواد عشان تأهلك للدراسة الجامعية و هنا الطالب بيبتدى يراسل الجامعات إللى حددها و بيبتدى يحضر متطلبات التقديم إللى هى بتكون شهادة درجات الطالب و خطابات ترشيح من بعض المدرسين، أو من المدرسة نفسها. و درجات معينة فى إمتحان ال SAT و ده عبارة عن إمتحان بيقس قدرات الطالب فى الرياضيات و القراءة النقدية و الكتابة أو ACT و ده إمتحان تانى بيقيس قدرات الطالب فى الإنجليزى و الرياضيات و العلوم و القراءة و الكتابة فيه إختيارى.
بعد كده بتيجى أهم خطوة فى التقديم و إللى الطالب بيكتب فيها مقالة عن هو ليه عايز يدرس فى الجامعة دي، وليه التخصص إللى هو مقدمله بالتحديد، و هيعمل بيه إيه و كمان إيه المهارات إللى عنده و بتميزه لدراسة تخصص زى ده. و ساعات المقالة دى بتعملك إستثناء لو كلامك شجع لجنة القبول و الملفات المرسلة بتثبت ده.
فى الاخر الجامعة إللى بتقبل الطالب بتراسله و بتبلغه بالقبول فى بعض الجامعات بتعمل مقابلة شخصية قبل القبول النهائى. يعنى الدراسة فى الجامعة بره مش مجرد حفظ و صم ودرجات. الموضوع بيبقى فعلا حد عنده حلم و عايز يوصله مش شكل إجتماعى . الجامعة بره أول درجات النجاح.
