لو متجوزة جديد.. «اقرأي الموضوع ده»
لكل البنات اللي لسة متجوزة جديد وفرحانة إن بقى ليها مملكتها الخاصة اللي هتبني كل ركن فيها بنفسها موقع «شبابيك» عايز يقولك انك عشان تكملي حياتك بنفس الفرحة ديه محتاجة تمشي على روشتة فيها حبة حاجات.
الحاجة الأولى
نفسك
خلي اهتمامك بمظهرك وشكلك يكون طول حياتك وميبقاش اهتمام لفترة معينة وبعد كدة خلاص، ومتتحججيش بإن شغل البيت كتير وانك بقيتي مسئولة عن زوج وأطفال لأن ده مش مبرر إنك متعتنيش بنفسك وبمظهرك وحطي في دماغك إن العناية بنفسك هتخليكي فريش دايماً.
الحاجة التانية
الملاحقة
متلحقيش جوزك في حياته روحت فين جيت منين بتكلم مين، لأن كل ده بيخليه يقفل منك، سيبيه هو اللي من نفسه يجي يحكيلك عمل ايه ولو لقتيه مضايق اسأليه مرة واحدة مالك لو قالك مفيش قوليله تمام وقت ما تحب تتكلم أنا كلي أذان صاغية، لأنك لو زنيتي عليه مش هيتكلم خالص في أي حاجة.
الحاجة التالتة
الأسرار
الأسرار اللي بيقولها زوجك ليكي مطلعهاش لحد أبداً لأنك لو طلعتيها طبعاً مش هتبقى سر وممكن حد يوصله السر اللي كان مأمنك عليه، وتحصل مشكلة بينكوا كبيرة، ولو فيه مشكلة جامدة جداً بينك وبينه وعايزة تتكلمي مع حد عشان يحلها ليكي، نقي صديقة ليكي مقربة جداً بتثقي فيها وعارفاها انها مطلعش أي كلام بينكوا برا واحكيلها.
الحاجة الرابعة
شوف مين
شوف جوز صحبتي جبلها ايه، شوف سفرها فين، شوف خرجها فين ، متحوليش تعملي مقارنة بين الناس وبين جوزك بغرض انك تقوليله اعملي زي ما بيعملوا، لأنه هيضايق وهيحس انه مقصر معاكي، سيبيه وهو هيعمل كل حاجة وبلاش تأذي مشاعره.
الحاجة الخامسة
الأطفال
لما ربنا يرزقك بالأطفال وحصل ان فيه خلاف كان بينك وبين جوزك متتخنقيش أبداً معاه وهما معاكي في نفس المكان، لأن الأطفال بيحسوا بكل حاجة بتحصل حواليهم وبيتأثروا بيها وأحسن حل انك تتكلمي انتي وجوزك في مكان تاني غير اللي هما فيه.
الحاجة السادسة
الفلوس
بما ان مرتب جوزك هياخده بالإيد اليمين وهيديهولك بالإيد الشمال :D فإنتي لازم تدبري ميزانية البيت وتقسمي الفلوس على حسب احتياجتكوا عشان تكوني ظابطة البيت وميحصلش خلل فيه.
