روزانا ناجح تكتب: شعار الوقفة «يا نساء العالم اعتصموا»
كل وقفة عيد، معروف شغل البنات بيكون توضيب البيت وعمل أكل وبعدها الصلاة، والولاد خروجات للصبح وبعدها الصلاة..العيد ده لازم نعمل وقفة خاصة!
شغل البيت بياخد وقت صحيح، وخلاص النهارده الوقفة وبكرة العيد..في الوقت ده البيت لازم يخلص كل حاجة تتظبط.
اولاً: البنات تمتنع عن شراء الحاجات وتسيب المهمة دي للولاد وآهي تشيل من عليها حمل النزول.. ولو محدش هيشتري حاجة يبقى أحسن برضه كده تضمنوا إن مفيش حاجة هتتعمل أصلاً.
ثانياً: يتم تقسيم الشقة بين العيلة كلها، وكل واحد يتفق إنه على الأقل يغسل حاجته مكان آكله أو يوضب سريره لما يصحى، وده هيساعد في إن الشقة تروق شوية واللي يكسر القانون يدفع غرامة تتقسم على الملتزمين..بس تكون كبيرة عشان الواحد يخاف.
ثالثاً: يتم رفع شعار help yourself في كافة أرجاء المنزل، مفيش حاجة إسمها إعمليلي حتى لو إختك البنت هي اللي آمرتك فكريها بالشعار، كله هنا بيشتغل دي حالة طوارئ يا جدعان.
كل دي حاجات تمهيدية لتخليص شغل الشقة والأكل بدري، أما بقى يوم الوقفة فده هيبقى يوم مخصص لتجمعك إنتي وأصحابك..لو هتخرجوا أو هتكونوا في بيت، لو خروجة نقوا مكان ما تتعرضوش فيه لمضايقات كتيرة ويكون مضمون وجربتوه قبل كده، لوحابين تخاطروا يبقى لازم تاخدوا إحتياطكم كويس، أو ممكن تتجمعوا في بيت حد منكم، وتسهيلاً لصاحبة البيت اللي هتستضيف اللمة دي كل واحد هيجيب حاجته معاه وبعد ما نخلص هننضف البيت.
م الآخر إحنا لازم تحصل وقفة مننا عشان وقفة العيد تعدي علينا بفرحة مش بمريلة المطبخ ولا المساحة في إيدينا، ولا إيه؟
