في المحاضرة «مش كل حاجة بتتكتب»
لو كنا في سنة أولى جامعة فأغلبنا متعودين على مذاكرة الثانوية العامة، وكتابة كل حرف ورا المدرس، أما في الجامعة الوضع مختلف شويه. لما بتقرب الامتحانات كلنا بنحاول نركز في أخر كام محاضرة ونكتب كل حاجة ورا الدكتور عشان نلحق نلم المنهج، لكن ده غلط لأن مش كل حاجة بتتكتب.
"شبابيك" بيقدملك مجموعة نصائح للمساعدة في استيعاب المحاضرات بالجامعة:
التركيز
لو ركزت بس على كتابة كل كلمة بيقولها الدكتور في المحاضرة فأنت بتضيع منك نص الشرح إللي بيقوله ومش هتعرف تجمعه تاني، لازم تعرف إزاي تجمع بين كتابة المحاضرة وإنك تسمع شرح الدكتور وتركز كمان معاه.
أهم حاجة
- المحاور الرئيسية والفرعيات
الدكتور في المحاضرة ممكن يكتب أو يقسم شرحه لمحارو أساسية وفرعيات لو ركزت وكتبت المحاور ديه هتسهل عليك المذاكرة بعد كده
- الرسومات
في بعض الدكاترة بتحب ترسم العناصر الأساسية للموضوع إللي بتشرحه على هيئة دوائر متفرع منها أفرع مختلفة، الرسومات ديه لازم ترسمها ورا الدكتور لإنها أول حاجة هتفتكرها في الآمتحان، وخد بالك مش لازم الدكتور يعرف إن الرسمه ديه مهمة، رسمتك ليها هيكون نابع من تركيزك معاه.
- الأمثلة
عدد كبير من الدكاترة أثناء شرحها بتقول أمثلة مختلفة تدلل بيها على مفهوم كل عنصر، الأمثلة ديه من المهم جدًاا إنك تكتبها فى الامتحان "الدكتور هيعرف إنك فاهم"
- الشرح
بعض الدكاترة بتحب تقرأ في ورقة الامتحان للطالب الشرح المبسط والأمثلة والعناصر إللي كان بيقولها في المحاضرة بيعتبرها الدكتور دليل على حضورك بإنتظام ليه وإنك مهتم بمحاضرته، وبالتالي فكتابة ولو جزء بسيط من شرحه لأي عنصر من العناصر بطريقة شرح الدكتور أو الاقتباسات إللي قالها في المحاضرة هيضمنلك درجات زيادة في الامتحان.
ملحوظة
المهم في أي محاضرة إنك تسمع كويس الدكتور بيقول إيه وتكتب وراه الأمثلة والعناصر والتقسيمات إللي بيقولها في المحاضرة، لإن الشرح المفصل في الأغلب هيكون في الكتاب أو المذكرة إللي بتاخدها قبل الامتحان.. أسمع وركز وأكتب إللي قولنا عليه .. هتذاكر بكل سهوله وتنجح كمان.
