أخطاء تجنبوها وقت الامتحانات
الامتحان بيكون الفيصل في إنك تعدي السنة أو لأ، ولأنه الفيصل فده بيخلي الواحد يقع في حاجات غلط مش قاصدها بسبب توتره، وعشان كدة «شبابيك» هيقولكوا على الحاجات دي عشان متعملوهاش وتعدوا من الامتحان على خير وبتقدير.
تسيب سؤال
ساعات كتير تسيب إجابة سؤال لآخر الامتحان على اعتبار إنك تديله وقت عشان تعرف تفكر في إجابته وده بيخليك تقع في حاجة من الحاجتين أولاً إن الوقت ياخدك وميبقاش قدامك وقت تحل السؤال وتضطر تكروت الإجابة، وتاني حاجة إنك تنسى بعد ما تكون سلمت الورقة إن فيه سؤال لسة مجاوبتش عليه.
تقرأ السؤال غلط
إنك تقرا السؤال بسرعة مرة واحدة وتفرح جداً إنك عارف إجابته وتقعد تبدع في الإجابة وبعد لما تخلص الامتحان وتراجع مع أصحابك تكتشف إنك جاوبت غلط وده لأنك مركزتش في السؤال كويس وقت ما كنت بتقراه.
دماغك تفكرك
ساعات وانت بتحل الامتحان تلاقي دماغك بتفكرك بمواقف حزينة ووحشة مرت في حياتك، وتلاقي المواقف بتختلط بالإجابة فبتلاقي نفسك بتجاوب وانت مضايق وده طبعاً بيخليك متطلعش كل الإجابة اللي عندك لأنك دماغك مش صافية.
تاخدك الدوشة
خناقة المراقبين مع بعض، عياط حد، فتح باب اللجنة وقفله، صوت العربيات في الشارع، كل الحاجات ديه بتخليك تركز فيها وتنسى انت بتحل إيه لغاية ما بتلاقي إن الوقت بيجري وتروح عادل نفسك على الكرسي ونازل حل بسرعة والحل ده طبعاً بيكون نص الإجابة لأن نصها تاني راح وسط تركيزك مع الدوشة.
