غضب طلبة امتياز كلية العلاج الطبيعي جامعة حورس بسبب المماطلة في التدريب وتحذيرات للمستجدين

دشن طلبة امتياز كلية العلاج الطبيعي دفعة 2022 هاشتاج متدخلش حورس، على موقع التغريدات القصيرة «تويتر» متقدمين من خلاله بشكاوى إلى إدارة الجامعة بسبب عدم السماح لهم بالتدريب في مستشفيات وزارة الصحة، ومماطلة الإدارة لهم.

أزمة كلية العلاج الطبيعي جامعة حورس

غضب عارم اجتاح موقع التغريدات «تويتر» على مدار الساعات الماضية، وصل أوجه اليوم، بعد إثارة الطلاب مشكلة تدريب خريجي العلاج الطبيعي جامعة حورس، والتي تلخصت في مماطلة الجامعة لهم في التدريب بمستشفيات وزارة الصحة، وإتاحة تدريبهم في مستشفيات الأمانة براتب 3 آلاف جنيه شهريًا.

وطالب طلاب دفعة امتياز 2022 علاج طبيعي جامعة حورس بالمساواة مع زملائهم من طلبة العلاج الطبيعي بالجامعات الأخرى والنزول لمستشفيات الصحة والأمانة بنفس الراتب الذي يحصلون عليه.

#متدخلش_حورس

وبعد تفاقم الأزمة، شارك العديد من الطلاب في هاشتاج #متدخلش_حورس لتحذير الطلبة الجدد من الالتحاق بها، وجاءت بعض التغريدات كالتالي:

 كان كفايه عليكم اداره المدرسه كان لازم توسعوها يعني وتفتحو جامعه وجواها كليات كتير اديكو نسيتو ان فيها علاج طبيعي وضيعتو مستقبلنا ينفع كدا؟

وكتبت متضامنة مع طلبة علاج جامعة حورس: أكتر دفعة اتظلمت، أكتر دفعة كانوا فئران تجارب لكل الكلية، احنا أصغر منكم بس حاسين بكم، واحنا معاكم لغاية ما كل الظلم اللي حصل لكم ده يخلص وتاخدوا حقكم، ربنا ينصركم عليهم علشان انتو فعلاً اتظلمتوا.

وغرد ثالث: عيب إدارة ولا عيب جامعة ولا حتى وزارة، احنا عاوزين حق تعبنا 5 سنين وتعب أهلنا معانا #امتياز_علاج_حورس_فين، #متدخلش_حورس،  #اي_سبب_تأخير_موافقة_الوزارة #مش_كفاية_دفع_فلوس_يا_حورس_ولا_اي #الطلبة_هتسدد_ديون_حورس_للوزارة

وغردت إحدى الطالبات: الله العالم الواحد تعب قد إيه طول الخمس سنين معاناة ومحدش بيصدقنا ومحدش كان بيرد علينا ولا بينصرنا، وكان كمان بيتزعق لنا ونتهان، عمري ما سامحت وعمري ما هسامح .

#امتباز_علاج_حورس_فين

وسم آخر دشنه الطلاب بعنوان #امتباز_علاج_حورس_فين؟، على موقع «تويتر» يطالبون فيه بإيجاد حل لمشكلة تدريب طلبة امتياز كلية العلاج الطبيعي جامعة حورس.

وقالت مغردة: إدراة الكلية دلوقتي طلع صوتها وقالت احنا مش عارفين نعمل لكم حاجة، احنا محتاجين حد يساعدنا يا إما التلات الصبح هنرفع القضية على الجامعة.

وقالت طالبة: لو الاستقالة وكشف عبثهم هيا الثمرة الوحيدة فأنا هكون مبسوطة، إن شاء الله هنصحي تكون الفضيحة في كل مكان ومتصدرين التريند وحقنا راجع ومنصورين عليهم، فيما كتبت أخرى: دفعة كاملة مش لاقية مكان تنزله ف الامتياز غير كفر الشيخ و القصر اللي عمرهم ما هيكفوا العدد ده كله.

مشكلة طلاب امتياز علاج طبيعي جامعة حورس

تفاصيل عديدة تضمنتها مشكلة طلاب امتياز علاج طبيعي جامعة حورس، حيث كتب الطلاب قصة أزمتهم مع التدريب في مستشفيات وزارة الصحة، قالوا فيها: باسم دفعه امتياز علاج حورس ٢٠٢٢ حابين نعرض مشكلتنا: حاليًا باقي على امتيازنا أسبوعين والجامعة قالت لنا مفيش صحة وفيه أمانة.

وأضافت: وحتى الأمانة لحد دلوقت لسه متمش التعاقد معاها، و لما طالبنا بحقنا إن احنا ننزل صحة ومفيش اي تعاقد تم معاهم حتى الآن، ومفيش متاح لنا غير المستشفيات التعليمي اللي هم في حدود 8 مستشفيات ومش متوفرين في كل المحافظات.

وتابعت: والجامعة بلغتنا إن الشهر هيكون بـ 3000 جنيه أو مستشفيات الأمانة اللي بتقبل عدد قليل جدًا والجامعة لسه لحد الآن مكملتش البروتوكول وهنضطر نسكن ونصرف مصاريف تانية غير الأسعار المبالغ فيها دي، احنا بنطالب بأقل حقوقنا هو أن نتساوي بباقي دفعتنا من طلاب امتياز علاج طبيعي في الجامعات الأخري وننزل مستشفيات الصحة والأمانة بنفس السعر اللي زمايلنا بينزلوا به.