7طرق تخليك تفكر بالألوان
الإبداع والبحث عن مبدعين شئ متداول جدا في كل المجالات بس ارتبط شكل المبدع بشكل الرسامين المعروفين. بس إللى أجمع عليه العالم إن كل شخص مبدع، لكن طاقة الإبداع دى مش مستخدمه عند ناس كتير أو مش بيساعدوا على إنها تخرج.
ولأن الإبداع مش حاجة معقدة زى ما الناس مصورين لينا. الموضوع كله فى إنك تربط المعلومات المتخزنة فى مخك بطريقة مختلفة عن الطبيعى أو إنك تفتح مساحات جديدة فى المخ وده مبيحصلش غير لما تعمل السبع حاجات دول:
حب نفسك:
أحيانا خوفنا من إننا نغلط أو نضر نفسنا بيوقفنا عن إننا نفكر بطريقة جديدة أو نمشي فى طريق محدش جربه. ولو غلطنا نلوم نفسنا كتير. بس الحيقيقة زى مابيقولها أينشتاين "إذا لم تخطئ فأنت لا تتعلم".. جرب حاجة جديدة وماتزعلش لو طلعت وحشه ولا تلوم نفسك وإعرف إن إختيارك كان صح لأنه عرفك حاجة جديدية عن نفسك.
اكتب بالورقة والقلم:
الدنيا بتتقدم والورقة والقلم بقوا موضة قديمة. بس الكتابة بعيدا عن الحاسب الشخصي ليها فوايد كتير وأولها إنها بتساعدك على تجميع أفكارك والربط ما بينهم بدون تشتيت. كمان بتدى مساحة أوسع للتفكير وبتساعدك بمرور الوقت على إنك تنتج أفكار جديدة.. خلى معاك notebook صغيرة و إكتب فيها الأفكار إللى بتجيلك فجأة وإنت ماشى أو بتشتغل أو حتى مع صحابك. و مش لازم تكتب فيها ممكن ترسم حاجات أو تسجل فيها مقولة تشجعك.
دور على هواية جديدة :
عشان دايما مشغول بين الشغل وطلباته أو الدراسة وواجباتها بتحس أن كل الأفكار خلصت وإنك دايما مضغوط . لما بتتعلم حاجة جديدة بتخرج كل الطاقة إللى جواك وبتحولها لطاقة إيجابية. محاولة إنك تتعلم شئ جديد بتخلى المخ يفتح مساحات وبتعزز طاقته على الإنتاج. إتعلم عزف على آلة أو لغة جديدة أو حتى الرسم.
إلعب مع العيال:
مين قالك إن الطفولة عدم مسئولية لو بصيت للاطفال و هما بيلعبوا و إزاى بيحولوا خيالهم حقيقة للحظة و بيبدعوا فيه. جرب إدخل العالم ده وعيشه وإستمتع بيه وإتعلم من الطفل إللى بتلعب معاه إزاى اللعب فن و مسؤلية .
خصص وقت للأشئ :
أيوا خصص وقت فى الإسبوع إنك تعمل فيه ولا حاجة. الإيطالين عندهم مبدأ كده بيطبقوه إسمه “Dolce far Niente” يعنى الإستمتاع بالاشئ. حاول تخرج عن كل متعود عليه فى الوقت ده، إسرح فيه براحتك غنى لنفسك أو إطبخ المهم إن الوقت ده يبقى بتاعك إنت ماتتفرجش على تلفيزيون ولا تستخدم فيه نت. إعمل ولا حاجة :) .
دلع نفسك:
ده غير وقت اللاشئ يعنى من فترة للتانية إخرج لوحدك وجرب مطعم جديد أو كل أيس كريم. فرح نفسك وإشترى لنفسك من وقت للتاني حاجة كده من إللى إنت بتحبها بس الناس بتقول عليها تافهه بس بردو إنت بتحبها. الحاجات دى بتخليك إجابى وبتغير نظرتك لكل حاجة وده بيخليك تشوف الدنيا بأفكار جديدة .
إتحرك :
أجدادنا كانوا بيقولوا الحركة بركة ودى حقيقة ثبتها طول ما إنت بتتحرك الدم بيجرى فى عروقك فالمخ بيتغزى فبيشتغل أحسن و أداءه بيعلى. إمشى يوميا وإلعب رياضة، شغل مزيكا وإرقص أى حاجة. المهم إكسر روتين حياتك عشان تعرف تطلع الجديد.
الإبداع شئ سهل بس إللى بيموته جوانا حواجز الروتين والفكرة العقيمة عن إن الإنسان العاقل ليه شكل محدد.
